Yuxanna 1

Min azal la Zaqat qalat, wa la Zaqat baak Rabbi qalat, wa la Zaqat Rabbi qalat. 2 Wa min azal baak Rabbi qalat. 3 Ibba Rabbi kil maklugh kalgha, wa imbal ibba maklugh iitkalagha. 4 La Zaqat xayot qalat wa la xayot igilla addaam nur qalat. 5 La nur diibba tsilmat laánawir wa la tsilmat igil taármishshu iitghaddir.

6 Inaas, Yuxanna Al Maqmadaan la litsamme, qala wa hitu min Rabbi tlaáka 7 ibba nur igil laákbir kil gaá igil liíman ibba sababba shahaadatu. 8 Yuxanna nosu la nur yaqala, hitu shaahud igilla nur ledta qala. 9 La nurra amaan igil killu laánawir asikka iddinya matstsí qala.

10 Hitu itta iddinya qala wa hitu tu la kalghaya. Laakiin la iddiniya ghawettu. 11 Asik adhuyu matsá wa adhuyu tgarafawu. 12 Minnaata igil killom la tkabbatawu, wa la amnaw ibbu xagh gibát wilaad Rabbi habayom. 13 Hitom la madenaay matwallaad ib shanhat aw sariid aadami iitwalladaw, laakiin ib matwallaad min Rabbi saadir.

14 Ka la Zaqat aadami gaát wa hitu migibna amaskaba. Wa xina matxaabaanu reéna, matxabaanna beynaay wa orotaay Wal la minna Ab matsá, la baqalla niqimat wa la amaan la taamaat. 15 Yuxanna ibbu ará wa asmaqa la maxaabir inde laáddaahe wa libil, “Illi la ilu iblakkum qalkotu dol ‘Giraaye nafar igil limtsá tu wa hitu ib zaaydat litwaghghalanni jalla ghadameye qala.’”

16 Wa minna niqimatu la waajdat, kilna min niqimat asar niqimat jaaghafna. 17 La shariiqat ib gabey Musa tfarradat laakiin la niqimat wa la amaan ib gabey Yassoq tkarraya. 18 Rabbi orot iiraáyu. Laakiin la orotaay Wal la hitu nosu Rabbi gaá, wa ghirub min libbu, hitu tu la Rabbi arénna.

Shahaadat Yuxanna it nosu

19 Illa shahaadat Yuxanna it nafsu ta waan la merxatta Yahud min Orshaliim gale kahana wa Laawiyiin laákaw igil min kim tu lissaólu. 20 Wa hitu ib bitkit, “Ana la Masex yaána,” belayom. 21 Ka saálawu, “Ka inta min inta? Inta Ilya inta?” “Ana ilu yaána,” belayom. “Ma inta la Nabi inta?” Ka, “Ib iifaal,” balsa. 22 “Ka min inta? Baliis habanna asikka laákawna igil naghbil ibbu. ‘Min ana,’ tibil?” 23 Ka belayom,

“Ana kirin itta kadan taáré wa taásammeq ana,

‘Igil Rabbi silal xaamlo,’”

kimma Ishqayá belaya.

24 Ka gale luúkaam minna Farisiyiin matsáw 25 wa saálawu, “Ka inta la Masex min yiínta aw Ilya aw la Nabi min yiínta, ka igil mi taqammid halleka?” 26 “Ana ib maay qammid wa laakiin diib migibkum la iittaámmuru halla. 27 Hitu tu la asareye matstsí, ana gabru ma igil igbá yaástilhil,” belayom. 28 Illi diib Betqanya it miqidaay Baxar Ordon la Yuxanna laqammid itta qala jara.

Yassoq karaamat Rabbi la zinubba iddinya tnawik tu

29 Wa itta asara, Yuxanna Yassoq asku inde matstsí raá ka bela, “Illi karaamat Rabbi la zinubba iddinya tnawik tu! 30 Illi la ilu ghasadko tu dol, ‘La inaas la xaghoye matstsí, baadirye tu jalla ghademye qala,’ ibelakkum. 31 Ana noshshe aamru yaqalko wa laakiin ib maay inde qammid matsáko igil Israíil igil litkashshaf.”

32 Ka Yuxanna ibilla shahaadat shahada wa bela, “La Rox min sama kim kaatra litkarre reékowu wa adtadtdtaxa ittu. 33 Ana noshe, aamru yaqalko, laakiin la ib maay igil qammid laákenni belenni, ‘La Rox inde litkarre ittu la tiríyu, hitu tu la ib Rox Ghiddus laqammid.’ 34 Illi reékowu wa hitu kim Wad Rabbi tu ishhid.”

Darasa Yassoq La Salfaayaam

35 Ka tsibixita, Yuxanna ib digmaan ken badtdtir qala wa mislu kilót minna darasaahu. 36 Ka Yassoq inde la herir raá ka bela, “Illi karaamat Rabbi tu!” 37 Ka la kilót la darasaay zaqatu waan samqaw, Yassoq talaw. 38 Ka Yassoq dolat twallaba asaru raáyom ka saálayom, “Mi taxazzu hallekum?” Ka, “Wo Qaalim, ittaya igil titmaye tu?” belawu. 39 Ka Yassoq, “Niqino wa ginxo,” belayom. Wa la waghit saaqat qarbaq qala. Ka talawu wa maskanu raáw, wa la amqil laha tgashshanawu. 40 La kilót la darasaay la Yassoq talaw waan Yuxanna inde lithaage ittu samqaw, orohom Andaraawus xu Samqaan Budtrus qala. 41 Wa agiidaay xuhu Samqaan igil laxize gesa. Wa kim rakbayu inintu, “La Masex waajahna!” belayu. 42 Ka asik Yassoq marxayu. Ka Yassoq shimuy Samqaan fadtna wa bela, “Inta Samqaan wad Yuna inta, wa laakiin Siifa igil ismeka tu.” (Siifa, aw Budtrus, “balghat asaas” bahalat tu.)

43 Wa la amqil la asara Yassoq asik mandtighat Al Jaliil igil ligiis nawa. Wa Fiilibos rakba, ka “Tilenni,” belayu. 44 Wa Fiilibos min Betsayda, balad Andaraawus wa Budtrus qala. 45 Wa xare Fiilibos Nasnaíil rakba, ka, “La Musa diibba Tawraat katba ittu wa la nabyaat diibba akitbatom rakabna wa hitu Yassoq wad Yusif la min Al Naasira tu!” belayu. 46 Ka Nasnaíil bela, “Min Al Naasira, la naffeq faggir?” Ka Fiilibos, “Naqa wa reé,” belayu. 47 Wa Yassoq Nasnaíil shankatu inde matstsí raáyu ka, “Illi Israíili asli ghishshish alabu tu,” bela ittu. 48 Ka Nasnaíil saálayu, “Min aya taámranni?” Ka Yassoq balsa ittu, “Xanna tiinat raékoka Fiilibos inde iilitlaakekka.” 49 Ka Nasnaíil belayu, “Qaalim yaha, inta Wad Rabbi inta! Inta Malik Israíil inta!” belayu. 50 Ka balsa ittu, “Inta jalla xanna tiinat reékoka ibelakka aamanka? Min illi wa laqal igil tiré tu.” 51 Xare bela, “Ib amaan amaan iblakkum, la sama fitxit ininta wa malaíkat Rabbi itta Wadda Aadami inde taqarrig wa titkarre igil tiráw tu.”

WhatsApp: [0035797656359]