Asik Orshaliim
21
Xagho tbarbarna minnom jahat Kus ib rittoq abxarna.
Wa la amqil la xaariit Rudos batsxana wa minna asik Baatra twajjahna.
2 Wa ken safiinat asik kataay Finiighiya inde tbattik rakabna ka tsaqanna itta wa abxarna.
3 Ghubrus kim treéttanna digalab xadagnaaha wa asik Surya ghaddamna asik Sur batsxana wa itta karena ajil la safiinat diiba daraba igil tikre qala ila.
4 La darasa xagho rakabna,
ken baakom saboq amqil kalána.
Ib gabey Rox Ghiddus Bulis tfaanaw asik Orshaliim igil iilaqaghlole.
5 Laakiin waghitna kim akla safarna igil naáttalaale tbaggasna.
Wa la darasa killom misil ansom wa ajanniitom asikka mifgaarra madiinat saarxawna wa itta nageb ib rikoq daqena.
6 Xagho twaadqana itta safiinat qaragna wa hitom asik qaddom qaghbalaw.
Diib Butulamaayis
7 Wa safarna attalaalena min Sur asik Butulamaayis wa diiba la xaw saalamna wa amqil xaalafna baakom.
8 Wa la amqil la asara ininsaafir Ghaysariiya batsxana.
Wa diiba Filibbos la mabashshir la orotta Sabqat tgashshena.
9 Wa hitu qarbaq walat awaaldo qalaya ilu wa hitan litnabbaá qalaya.
10 Wa xagho ken amqilotaat xaalafna,
nabi Aghaabus min Al Yahudiya darra.
11 Kim matséna mandtagat Bulis nasá wa nafsu asra ibba wa idayu wa qaghaabu aasir inintu bela,
“La Rox Ghiddus libil,
‘Baqal illa mandtagat,
Yahud Orshaliim kiínna igil liísoru tu wa la umammiyiin igil lisallumu tu.’”
12 Waan illi samqana xina wa la addaam la ken qalaw Bulis dakkalna asik Orshaliim igil iilaqaghlole.
13 Asaru Bulis balsa,
“Igil mi tbakku wa libye tagharraxo hallekum?
Ana duluy halleko diib Orshaliim,
igil itaássar ledta inde iigabbí,
igil imut diiba ma jalliib simet Yasoq.”
14 Wa kim qaghnaqot aba inna azamna minnu wa imbe,
“Iraadat Molaay titmam.”
15 Wa xaghohu daalena wa asik Orshaliim twaghghalna.
16 Gale minna darasa la min Ghaysariiya taalawna wa asik bet Manaasun amtsaáwna mislu igil nitsnax.
Wa hitu darasaay ghadiim min Ghubrus qala.
Diib Orshaliim
17 Waan Orshaliim batsxana la xaw ib lawagh kabbatawna.
18 Tsibbixiita xina wa Bulis Yaqghub igil nigaanex gisna wa sabba gats killom xaadraam qalaw.
19 Wa Bulis saalamayom wa ib tafsiil ibba Rabbi wadayu fingela umammiyiin ib gabey kidmatu dagma.
20 Dolat illi samqaw Rabbi xammadaw.
Wa xare igil Bulis belawu,
“Xuna,
kam aalaaf minna Yahud kim amnaw tiré halleka wa killom igilla shariiqat mutaxammisiin tom.
21 Hitom inta killom la Yahud la fingela umammiyiin saaknaam igil min Musa littawnako kim taqallim wa ajanniitom igil iilaákshibo aw kimma lamadna igil iilitnaabaro kim taámmir samqaw.
22 Ka mi nibasir?
Simmaqom ib mitsátka iitarrif.
23 Ka la niblakkaatu wide.
Qarbaqat inaas bigona wa hitom nazir nazraw.
24 Ka nisóm wa dtahaaratom taxaawal wa figgarom difaq igil litgalxaw.
Wa kim figgariitu,
killu la tbahala itka miney kim tu igil lifhamo,
wa inta noska minna shariiqat fitik kim iitibil.
25 La emnat la umammiyiin lakassis,
gharaarna katabna ilom min nabra igil asnaam ghiddimit wa min dam wa min siga shinghit wa min zina igil lijjamalo kim bom.
26 Wa itta amqil la asara Bulis la sab nasá wa mislom dtahara.
Wa xare la haykal ata makallasila qilatta tadthiir igil lisajjil wa la sadaghat igil ayihomka igil titghaddam.
Isro Bulis
27 La saboq amqil ghirub xaliif kim gaáya gale Yahud min mandtighat Aasiya Bulis raáw diibba haykal.
Ka killu la maxbar fatnaw wa tsabdtawu
28 inlidtaarxo,
“Wo Israíiliyiin,
sidawna!
Illi tu la killu wa it kil akaan did shaqabna wa shariiqatna wa illi haykal laádarris.
Wa bardu diibba haykal umammiyiin aata wa la akaan la ghiddisit najjasa.”
29 Ghadam illa Tirufiimos la baqal Afasos baak Bulis riíyaam qalaw diibba madiinat wa diibba haykal aatayu amsalaw.
30 Ka killa la madiinat hejat wa killu la addaam min kil ghileq ib saqey matsá.
Wa Bulis tsabdtaw wa minna haykal saxabawu wa bigiidaay la manaagí daabát.
31 Wa igil lightolu inde jarribo,
madiinat Orshaliim ib tamaama shawsharat kim qammatta ghaayidda desh la Romaani batsxa.
32 Ka itta dolu gale merxat wa qaskarom nasá wa gats taxat daggaxaw asikka maxaabir.
Wa la rabbaashyaam waan raáwom,
zaabaadt Bulis atkaaramaw.
33 Wa la ghaayid shaága wa tsabdtayu wa ib kilé silsilat igil litaássar ammara.
Wa darbu min kim tu wa mi kim wada la maxaabir saála.
34 Wa la maxaabir galehomka ib fintuy anaadha.
Ka jalla la ghaayid ibba sababba shawsharat la amaan igil libtsax iighadra,
Bulis asikka xaamyat igil litnassaá ammara.
35 Wa dolat Bulis la qatabaat batsxa la shaghabba lammat sanni zaayada ka la jinud igil lirfiqiwu tghassabaw.
36 Wa la maxaabir la darbu gaát tsiraara attalaalet,
“Litqaadam!”
intibil.
Daafqot Bulis ghadam Yahud
37 La jinud asikka xaamyat igil laáatuwu ghaarbaam inintom,
Bulis la ghaayid saála,
“Xatte igil issaálakka?”
Wa la ghaayid,
“Yunaaniyat tithaage iiseékoka!”
inlibil balsa ittu.
38 “Inta la Masri la ghadam illa sawrat harraska wa qarbaq alif irhaabi asikka baadobat marxaka yiínta?”
39 Ka Bulis balsa,
“Ana Yahudi min Dtarsus la diib Kiliikiya ana,
mawaadtin madiinat ghallaal yiána.
Ib maqrufka la shaqab ithaage xidaganni,”
inlibil.
40-1 Ajjazotta ghaayid xagho rakba Bulis itta qatabat badtra wa asikka shaqab ashshara.
Wa killom dolat azmaw,
ib Araamiyat belayom,
“Wilaad qad yahaw,
aze daafqochche attansu.”