Widday Rox Ghiddus
16
“Illi igil iitaxaragaargo ibelakkumtu
2 jalla minna maqaabid igil tidtarrado gaákum.
Wa waghit igil limtsá tu dolat la ghatlukum,
kidmat igil Rabbi waddu hallaw massillom.
3 Wa hitom illi waddu itkum sabab Abuye iilaámaro wa iilamruni.
4 Ibbilli assaálkokum dolat jarre kim addagagkokum ibbu igil tifghado.
Wa ib salif ibbilli iiballaghkokum jallaab qalko gokum.
5 Aze laatu,
asikka laákenni igil qaghbil tu,
wa minkum,
‘Aya tgayis halleka?’
la liblanni alabu.
6 Waan illi assaálkokum,
albaabkum ib gahay tmallaát.
7 Laakiin,
ib amaan min igayis,
laxaysakkum.
Min yiígayis,
la Martiqiyaay iimatsaákkum.
Laakiin,
min igayis,
ilíkku itkum.
8 Wa dolat matsí,
la iddinya laxaasib it sixitaan wa salaax wa xikim:
9 la sixitaanom,
jalla yaámno ibbiye tu,
10 wa salaax,
jalla ana asikka Ab igil qaghbil gaáko wa xagho illa igil tiráwni iiko,
11 la xikim,
jallaab did xaakim illa iddinya xikim sadra matsá.
12 Bizox la iblakkumtu biye.
Laakiin,
aze igil tidturu iitghadro.
13 Minnaata dolat la Rox Ghiddusa matstsí,
asikka killu la xagh marraxakkum.
Hitu min nosu iilithaage,
ibba samqayu laássílakkum indiíko,
wa ibba la igil ligbaá tu laátámrakkum.
14 Wa hitu igil laxabinanni tu jalla la daggimmu ikkum,
minye saadir tu.
15 Killu naayya Ab lagabá,
naayye tu.
Ajil illi,
la Rox la minye tkabbatayu ballighakkum ibelakkum.”
Xazan lawagh laqaghabbil
16 “Xagho ghirubaat igil tiráwni iiko wa xaghohu ib xinkato igil tiráwni tu.”
17 Gale minna darasa xid saálaw,
“Dol,
‘Xagho ghirubaat igil tiráwni iiko wa xaghohu ib xinkato igil tiráwni tu,’
wa,
‘Asikka Ab igil igiis tu,’
libil,
mi ghassid halla?
18 Mi ghassid ib,
‘Xagho ghirubaat’?
Iifahamna,”
belaw.
19 Yassoq kim igil lissaólu ibbu laxazzu qalaw fahama ka belayom,
“Ib ghasijje xid tissálo hallekum,
‘Xagho ghirubaat igil tiráwin iiko laakiin xaghohu ib xinkato ib xadiis igil tiráwni tu,’
ibe?
20 Ib amaan amaan iblakku halleko,
ibba sababa jarre iyye igil tijaammo wa tixzano tu,
laakiin la iddinya igil titlawagh tu.
Intim igil titgabbaó tu minnaata gibíkum farxat lib igil titbaddal tu.
21 Kimsal matstsat mixidt igil tigbá tu.
Waan la girza litwallad,
la matstsata farxat igil tiwaale tu jalla wilud amtsát.
22 Intim aze,
gihiyaam hallekum.
Laakiin,
xare igil tiráoni tu wa igil tifraxo tu wa oro la farxatkum igil lislab minkum iighaddir.
23 Itta waghit lahey,
ib xatte igil tissaáluni iiko.
La amaan assiílakkum halleko,
minna Ab igil tidtlabo tu wa hitu xizitkum igil lahabakkum tu jalla ib simechche dtalbo.
24 Ghadam illa,
kiínna waadyaam yiíntim.
Ib simechche dtilabo wa igil lithayabakkum tu wa farxat kiyil igil tirkabo tu.
25 Ib amsaalaat itaagekum nabarko.
Aze laatu,
it bagaayid mathaagaay ib amsaalaat igil xidag tu wa ib baarih ibba Ab igil assiílakkum tu.
26 Itta waghit lahay,
ib simechche igil tidtlabo tu.
It akaankum minna Ab igil idtlab tu iblakkum yahalleko
27 jalla la Ab nosu marra fattekkum sabab iyye tfattu wa min Rabbi kim matsáko taámno.
28 Qaabo,
minna Ab asik iddinya matsáko wa aze la iddinya igil xidag wa asikka Ab igil qaghbil tu.”
29 Xare la darasa belaw,
“It dangoba ib ghiloq tithaage halleka,
ib amsaalaat inde iigabbí.
30 Aze killu kim taámmir fahamna wa ballis ghadam saál taámir.
Wa ibbilli kim min Rabbi matsáka naámmin.”
31 Wa Yassoq saála,
“It makallasi aamankum?
32 Laakiin,
la waghit matstsí halla,
ib amaan la waghit la diibu titfandtaro aakil halla.
Ayiikum ka gabeyu igil libtak tu,
ib bayinye inde tarakkuni.
Ligbá ma indiíko,
bayinye yiígabbí jalla la Ab halla goye.
33 Illi killu ballaghkokum diibye salaam igil tirkabo.
Diib illa iddinya,
jirab igil tiráw tu.
Laakiin simínna ikkum,
ana la iddinya ghalabkowa.”