Yassoq qaaghaab darasaahu laxatstsib
13
Ghadam Qiid Al Fisx,
Yassoq waghtu illa iddinya igil lixidag wa asik Abuhu igil laqaghbil kim akla aamara.
It midir inde kaddim,
darasaahu fatte qala wa aze imbal xisaab fatayom.
2 Ghadamma waanna diraar ma,
shedtaan diib lib Yahuza Wad Samqaan la Iskaryudti waswasa Yassoq igil likayin.
3 Yassoq la Ab sildtat it kil sinaq kim sallamayu laámmir qala wa kim min Rabbi matsá wa asik Rabbi kim igil laqaghbil tu.
4 Minna miqgaalla diraar ghantsa wa bilaayu warka wa mamsas nasá wa tahababayu.
5 Wa darbu maay diib maxtsabiit balsa wa qaaghaabba darasaahu igil lixitsab astabda wa ibba mamsas la hibbubu qala maasasayom.
6 Wa dol Samqaan Budtrus batsxa,
Budtrus,
“Mamba,
inta qaaghaabye igil txitsab tu?”
belayu.
7 Ka Yassoq balsa ittu,
“Inta aze la iwaddiyu halleko iitifhimmu.
Minnaata xaariit igil tifham tu.”
8 Laakiin Budtrus ashalxala,
“Killu raásu qaghaabye iitaxatstsib!”
Ka Yassoq balsa ittu,
“Qaaghaabka min yaxatstsib,
xazot alabka goye.”
9 La xiin laha Budtrus belayu,
“Mambaaye,
qaaghaabye ledta inde iigabbí,
idayye wa raáshshe ma,
xitsabbom.”
10 Ka Yassoq bela,
“La litxatstsab ib tamaamu ladtdtex wa xatsiib qaaghaabu ledta laátxaziyu.
Wa intim laadtxaam intim laakiin kilkum iiko.”
11 Yassoq la igil likayinnu tu mintu laámmir qala jalla illi,
“Kilkum laadtxaam yiíntim,”
bela.
12 Wa xagho xatsiib qaaghaabom atmama,
billaayu twanzafa wa ib xadiis taqaggala wa saálayom,
“La wadekowu ikkum fahamkumu?
13 Ka intim,
‘Qaalim,’
wa ‘Mamba,’
tibluni wa amaankum tu;
ana kimsalhu ana.
14 Ka ana Mamba wa Qaalim inde ana,
qaaghaabkum mindi xatsabko,
intim ma,
qaaghaab xid igil txitsabo halla ikkum.
15 Ka ana tamsaal gaáko ikkum kimma wadekowa ikkum igil tidaw.
16 Ib amaan amaan iblakkum halleko,
gabir min mambaahu iilaxayis wa luúk ma,
minna liíkaayu.
17 Ka illi fihimaam mindi hallekum wa min taqamlo ibbu,
sab gad gaábbó.”
Kayaanat Yahuza
18 “Ana illa it kilkum yiíbilla jalla la xarekowom ammir.
Laakiin la Kitub igil litmam bu,
‘La nabraye balqe,
tballasa ichche.’
19 Ana la igil ligbaá tu ghadam gibátu assiílakkum tu dolat gaggí kim ana tu igil tiímano.
20 Ib amaan amaan iblakkum halleko,
luúkye la litkabbat,
iyye litkabbat wa la ghablanni,
la laákenni ghabbil.”
21 Yassoq illa dolat bela,
nafsu shawsharat wa qallana,
“Ib amaan amaan iblakkum halleko,
orokum igil likaynanni tu.”
22 Ka la darasa taxayaraw wa xid ginex minex belaw wa hitom min kim ghassida yaámaraw.
23 Wa la darasaay la Yassoq fattiyu jahat Yassoq shiíg qala.
24 Ka Samqaan Budtrus ashshara ilu Yassoq igil lissaál la ghasdayu min kim tu.
25 Ka shankat Yassoq dallala wa saálayu,
“Mamba,
min tu?”
26 Ka Yassoq balsa,
“Hitu la lighmat la ighammishsha la hayibbu tu.”
Asaru la lighmat ghamshaya wa igil Yahuza wad Samqaan la Iskaryudti habaya.
27 Wa xaghola lighmat losha,
shedtaan atayu,
ka Yassoq belayu,
“Agiidka,
niwetka atmim!”
28 Minna liddarraro mislu qalaw,
orot igil mi kiínna kim belayu iifahama.
29 Sabab Yahuza tsebdtaayya sandugh qala,
gale minnom igilla qiid la latxaziyom igil lizzaabe ammarayu maslayom.
Wa biqidaam haye,
igilla diburaam gale maal igil lahab ammarayu maslayom.
30 Wa Yahuza kim losha inintu,
agiidaay itta laalihu fagra.
Yassoq ib bara Budtrus litnabbá
31 Yahuza fagir kim bela,
Yassoq bela,
“La waghit la Wadda Aadami litxashsham ittu wa ibbu Rabbi litxashsham xena.
32 Jalla Rabbi ibba Wal taxashshama,
hitu nosu xishmat igilla Wal igil lahab tu.
Wa illi azetaay igil ligbaá tu.
33 Yahaw wilaad,
igil waghit xaciir ledta igil itsnax gokum tu.
Intim igil tixizawni tu laakiin kimma igilla merxatta Yahud ibela,
iblakkum halleko asikka igayissa igil timtsó iitghadro.
34 Sababu,
ana aze wasiyat xaddaas haybakkum halleko:
Xid fitaw.
Kimma ana fatekokum ta,
xid igil tiftaw halla ikkum.
35 Xid min fattu,
igilla iddinya darasaaye kim intim shahaadat gabbó.”
36 Ka Samqaan Budtrus saála,
“Molaay,
aya igil tigiis aamim halleka?”
Wa Yassoq balsa,
“Inta aze igil tigiis baakye iitghaddir laakiin xare igil taqarrenni tu.”
37 Ka Budtrus saála,
“Aze igil mi yiíttaaleka,
Molaay?
Igil fizzaaka igbá duluy halleko!”
38 “Rixka igil tissabbil iyye tu?
Ib amaan amaan iblakka halleko,
la diik inde iinaghghe,
inta salas dol igil titbarrenni tu.”