La mawqilaay la marashdaay
10
“Ib amaan amaan iblakkum halleko,
kalebba qabaageq ib iimangaátu la laátte aw ib miítaay biqidat la saadtidt ittu,
hitu serghaay wa zemtaay tu.
2 Wa ibba mangaát la latte,
hitu tu mawqilaayya qabaageq.
3 Wa la qeghbaay kassit ilu wa la qabaageq izin karre ilu.
Ka la qabaagqu la liliit laádhe xattekaaha ib simeta wa minna kaleb laáttawalwilla.
4 Wa waan laáfaggirra,
marrex ila wa hita talliyu jalla la kirintu tfarrig.
5 Hita asar iimawqilaayya iitgabbí,
hitu di tgallib minnu jalla hita kirin iimawqilaayya iitálele.”
6 Yassoq ibbilla masal shibaabiib habayom laakiin imaamiibba zaqatu iifahamawu.
7 Xare ib digmaan bela,
“Ib amaan amaan iblakkum halleko,
mangaátta qabaageq ana tu.
8 Ghadameye la matsáw,
killom serghat wa zemtat tom.
Laakiin la qabaageq izin iikaret ilom.
9 Ana la mangaáat ana.
La laátte ibbiye naggif wa bayí wa faggir wa qalaf rakkib.
10 Serghaay igil lisragh wa lightal wa lahaalik ledta matstsí.
Ana laatu,
xayot igil lirkabo matsáko;
qaabo xayot taamat.
11 Ana mawqilaay marashdaay ana.
Wa mawqilaay marashdaay arwaxu fiza qabaagqu waddiya.
12 Talaay kimma mawqilaay iiko jalla la qabaageq milku iigaát.
Ka dol karaay inde tmatstsí liré,
la qabaageq laxaddig,
nafsu igil laángif.
Ka la karaay itta qabaageq tbarrigh wa firtekat twaddiya.
13 Sabab talaay gaá laharrib wa ibba qabaageq iilitáyas.
14 Ana laatu,
mawqilaay marashdaay ana.
Wa qabaageqye ammir wa qabaageqye taámranni
15 kimma la Ab laámranni ta wa ana ammirru ta.
Wa ana arwexye isabbil ajilla qabaageq.
16 Qabaageq biqidat biye wa hita ittilli kaleb yahallet.
Igil amtsá halla iyye wa hita kirinche igil tismaq tu,
orot mawqilaay ib oro salfu igil lahalle.
17 La Ab fattenni jallaab arwexye isabbil igil attakriya.
18 Arwexye nassí minye alabu,
noshshe ib xiryaanye isabbila indiíko.
Wa sildtat biye igil isabbilla wa igil iblassa ma waan ishshannah.
Wa illa wisaayat Abuye igilye ta.”
19 Illan dolat bela,
raáyya addaam ib kisusu ib xadiis tkaafala.
20 Bizxaam minnom,
“Shedtaan maalku tu wa jiddub tu.
Ka igil mi taáttansiwu?”
liblo qalaw.
21 Wa gale biqid,
“Illa higya shedtaan maalku iiko.
Shedtaan qintaat qawayir igil liftaxaay ghaddir?”
belaw.
Yassoq la Masex kim tu laqallin
22 Itta Qiidda Xaddasotta Haykal diib maghayam,
23 Yassoq ghabatta haykal laherir qala diib Ghaaqat Silemaan.
24 Ka la addaam qashlaw ittu wa saálawu,
“Asik midol igil taxayranna tu?
La Masex min inta,
ib ghiloq assiílanna.”
25 Yassoq balsa ittom,
“Ghadam illa,
assaálkokum laakiin iitaámnuni.
La dalil la widaddiit la ib sildtat Abuye iwaddiya tu.
26 Laakiin intim iitaámnuni jallaab qabaageqye yiíntim.
27 Qabaageqye laata,
izin karre iyye wa ana ammirra wa hita tallenni.
28 Xayot diima hayibba ka igil diima iitahallik wa orot iigalliya min ideye.
29 La Ab la habennita min killu litwaghghal wa orot minna ide la Ab igil liglaya iighaddir.
30 Ana wa la Ab xatte xina.”
31 Ka ib xadiis la addaam iman harrasaw igil lirjomu.
32 Ka Yassoq belayom,
“Ib tawjiih Abuye wadaddit saalxat bizxit wa riít wadeko.
Ib sabab ayiha igil tirjamuni tu?”
33 Ka balsaw ittu,
“Xina ajil sema widdaay saalex inrajmakka yahallena,
imbal kifir.
Inta inaas qaadi inta,
wa Rabbi igil tigbá taqadtnaadtidt halleka.”
34 Ka Yassoq balsa ittom,
“Diib shariiqatkum kitub halla Rabbi igil gale minna merxatta shaqab,
‘Aalihat intim ibil,’
kim bela.
35 Ka la shariiqat illom la zaqat Rabbi tkarret ittom aalihat min sammiyom,
wa la Kitub iilitbaddal,
36 ka intim kafo igilla Rabbi ghaddasayu wa asikka iddinya laákayu,
‘Inta,
taákaffir halleka,’
tibulu sabab,
‘Ana Wad Rabbi ana,’
ibe?
37 Wadaddiit Abuye min yiínaffiz,
iitímanuni
38 laakiin widdaayu min iwadde,
birhaanna wadaddiitta mistinkiraat la ila wadeko imano ib iyye ma min iitaámno.
Xaghohu igil tifhamo tu la Ab diibye kim halla wa ana diibba Ab kim halleko.”
39 Ka ib digmaan igil litsbodtu jarrabaw minnaata hitu farra minnom.