Masalla xarastot la ghetlat
12
Xarteni Yassoq ib amsalaat igil lithaagayom astabda wa bela,
“Inaas nabra.
Wa hitu,
jinenat qinab qabghala.
Wa ib kaana kallalaya wa kokan camiim qinab xafra itta wa iraara nadgha.
Wa xare igil xarastot atkaaraya wa taxayaba.
2 Waan ittey kim xena,
shaghghaalaayu laáka asikka xarastot kiflatu minna itteyya qinab igil litkabbat ilu.
3 Daám hitom galawu wa caadanawu wa ib haalu balsawu.
4 Asaru shaghghaalaay biqid nadá ittom.
Illi fagháwu wa ib zillat ghaarxawu.
5 Xaghohu saalsaay qatqara wa hitu ghatlawu.
Ka biqidaam bizxaam nadá,
illom ma galehom zaabadtawu wa gale ghaatalwu.
6 It dangoba,
la inaas sema iitarfa ilu imballa waldu,
la oro la fituy.
Hitu ma,
laákayu ittom,
‘Walye igil laxashshumu tu,’
in libil.
7 Laakiin la xarastot igil xid belaw,
‘Illi la waarsaay tu.
Niqno nightallu.
La wirsu bixitna igil ligbá.’
8 Ka tahalghamawu wa ghatlawu wa minna jinenetta qinab adrabawu.”
9 Ka Yassoq saála,
“Asar illi,
la baqalla qinab mi bassir?”
Nosu balsa,
“Mi ma,
faraashikkom wa la jinenattu igil xarastot kaalíyaam laátajjirra.
10 Illa aayat iigharákuma?
‘La immanat la nedghat tgaarafawa,
hitata la iminna xighaab gaát.
11 Illi Rabbi qamlayu wa raáyatu taqatqajib.’”
12 Ibbilla masal kim gadáyom traáyom,
ka igil liísoru sardaw.
Laakiin minna naqabba maxaabir sagáw ka tarkawu wa heraraw.
Werko igil Ghaysar
13 Xaariit la merxatta Yahud gale Farisiyiin laákaw ittu wa anfaar xizib Hiridos it sharak lissaan igil likrawu.
14 Ka matsáwu wa belawu,
“Qaalim yaha,
xina naámmir inta baqal amaan bitkit kim inta wa ib maghaam aadami iititayas.
Daám adrasot aslul Rabbi kimma xagh marraxa.
Jalla illi,
igil Ghaysar werko igil nidfaq litájjaz,
ma iifaalu?
Assiílanna.”
15 Laakiin Yassoq riyaahom kashfa wa saálayom,
“Igil mi igil taqashnughuni tjaarbo?
Dinaar amtsó igilye igil ignaxu.”
16 Ka dinaar amtsáw ilu wa saálayom,
“Illa surat min ta wa illi naghish min tu?”
Ka balsaw,
“Naay Ghaysar tom.”
17 Xaghohu Yassoq belayom,
“Naay Ghaysar lagá,
Ghaysar sallumu wa naay Rabbi lagá,
Rabbi sallumu.”
Ka tfakkaraw ittu.
Ghaniits maaytaam
18 Xahgo illi,
galela Sadughiyiin la ib ghaniits maaytaam iilaámno matsáwu wa saálawu,
19 “Aabretka,
Qaalim.
Musa illi katba inna,
‘Xu orokum min mayit wa xemahu min tarrif inde iizarre minna,
xuhu la mabalu igil lihde bu wa ibba simma xu lamaayit igil lilad minna.’
20 Sabqat xu qalaw.
La awalaayya xaw illom issiit hada.
Wa inde iiwallid minna mota.
21 Ka la kaalaáy hadaya wa hitu ma inde iizarre minna twaffa.
Wa la saalsaay ma qarra.
22 Wa kiínna sabqiitom hadawa wa inde iiwaldo minna motaw.
Wa xagho killom,
hita motat.
23 Yom alghiyaama,
issiit ayihom igil tigbá tu,
illa hita la issiit sabqiitom qalat?”
24 “Yaaretkum jaalyaam hallekum,
la Kitaab ib yaámrotkum wa ghadrat Rabbi iifahamkum.
25 Addaam min mot dol ghanits iilahaddu wa iilathadu.
Hitom tamsaal malaíkat qasattir gabbó.
26 Saál maaytaam ghantso mi iiko,
kitaab Musa balsayu,
mi iigharákumu?
Itta digimma kitkittotat Rabbi dol igil Musa,
‘Ana Rabbi Ibrahim wa Isxaagh wa Yaqghub ana,’
belayu.
27 Hitu laata,
Rabbi haamdaam iiko,
Rabbi xiyayaam indiko.
Ka intim it bada wa ghawa hallekum.”
La wasiyat la salif salfayit
28 Orotta maémratta shariqat matsá wa in litkaxdo laáttansiyom qala.
Wa Yassoq ballis kaafi kim habayom kim atsbata saálayu,
“Ishiwata la wasiyat la salif salfayit?”
29 Yassoq balsa ittu,
“La wasiyat la salif salfayit,
‘Wo shaqab Israíil attanse:
Molaay Rabbina oro tu.
30 Ka Molaay Rabbika fite min killu libka wa ib killa nafiska wa ib killu fikirka wa ib killa ghidratka.’
31 Wa la kaaláyit wasiyat la qaalyayit,
‘Biqidaam kim nafiska fite.’
Illan latwaghalaya wasiyaat tan.”
32 Ka la maémraayya shariqat bela,
“Wo Qaalim,
asneka.
Inta it xagh halleka.
Rabbi oro tu wa imbalhu ilaah biqid yahalla.
33 Wa ib fittihu min killu libka wa ib killu fikirka wa ib killa ghidratka wa fittika igil biqidaam kim nafiska illan min killu la xagaag wa la karamaat laxaysa.”
34 Wa Yassoq dol ib libaab balsa samqayu,
“Inta min mamlakat Rabbi rixigh yahalleka.”
Xagho illa,
oro saálaat biqid igil lisaállu yaábtaka.
Mamba Daawid
35 Yassoq diibba haykal laádarris inde qala,
saála,
“La maémratta shariqat,
kafo la Masex wad Daawid tu liblo?
36 Jallaab Daawid nafsu ib kashif Rox Ghiddus bela,
‘Rabbi igil Mambaye belayu,
“Dimaanye tgasse asik abbachka kiyadka iwadde.’
37 Ka Daawid nafsu Al Masex Mambahu samme.
Ka kafo Al Masex waldu geé?”
Wa la maxaabir Yassoq ib lawagh laátansu qalaw.
38 Yassoq it adrasotu bela,
“Minna maémratta shariqat daxano,
la jarraat inde labsaw igil laganaadlo wa it xarraat addaam igil lissalammom lishshannoho.
39 Wa it saf awal igil ligbaó diibba maqaabid wa it magaasiit sharaf igil litgaasaw it walayim.
40 Wa misil illi,
maal manabbil zamto,
wa salataat laátraaymo igil litraáw wa lissammoqo.
Wa ibbilli ladtalfaxa qazaab litkarre ittom.”
Hiyaab
41 Yassoq ghiblaatta sandughgha tabaraqaat la diibba haykal tgassa.
Wa la addaam attaghaabala agrush in karru diibu.
Wa bizxaam minna tsigubaam agrush bizxit karru qalaw.
42 Ka mabal xaaglat matsát ka diibba sandugh kilót girish ghimatom sanni xidit karet.
43 Ka darasaahu adha wa belayom,
“Illa mabal xaaglat diibba sandugh min killom la biqidaam lakarawu labazzex karet.
44 Jalla killom min tirrafom habaw.
Minnaata hita,
minna xigzit ittu habat sabbat killu labaatu habat.
Qaabe,
killu latnabbir ibbu qalat.”