Sifaat Wilaad Yaqghub
49
Yaqghub inde atla wilaadu adha wa belayom,
“Tkallaluni ibba itta amqilotaat la ghadamekum hallaya la rakbakkum igil xaakekkum.
2 Yahaw wilaad Yaqghub tkamkamo wa izin kiraw,
waaldaaykum attansua.
3 Ruábiin,
inta bikirye wa xilachche
wa ishaarat helal tirijje inta.
Inta tingholiit jah inta
wa tingholiit fidib inta.
4 Minnaata inta kimsal baakraat taádafaaris,
inta xaris xar igil taqaghbil tu,
jallaab nidtdtaaf abuka tnadtdtafka
wa it qaraachche tahanghabka wa mankalkaaha.
5 Shamqun wa Laawi tamaasil tom;
asyufom mashshaghayi ghassabot tom.
6 Ana di mataaliitom yiígabbí
wa it maxbarom yaámxabir
jalla ib ghaharom sab ghatlaw
wa ib matallahot afkaak qabqirat faraagho.
7 Ghaharom luqun tu jalla shirqun gaá
wa ghadabom jalla ghaasi gaá.
Ghabat talak Yaqghub imanzirrom
wa diib Israíil itelikkom.
8 Yahuza,
xawka igil laxamduka tu
wa igil lisjado ikka tu
wa abbachka igil taxaanigh tu
9 Yahuza walye,
shibil la giddaalu daghma
kim xayat littarghab wa lishshaddax
kim labwat,
min tu la igil linaffizzu laábatik?
10 Milik min Yahuza iizawil
wa taaju iilitkantat
asikka la itta qarish xagh bu dtabash libil
wa umam dtayqu.
11 Hilkiibu diibba qinabat laásir
wa adgu diibba xiruyya qaghshuna
wa abaliitu ibba nabiiz laxatstsib
wa lababbisu ibba damma qinab.
12 Qintaatu min nabiiz kalxim
wa anyaabu min xaliib tsaqade.
13 Zabulun diibba kataayya baxar igil lixidar tu
wa kataayu marfá igil safayin igil ligbá tu
wa mamlakatu asik Saydun igil titmaddad tu.
14 Wa Yaskaar adig dingilaay
finge kalayib igxum tu.
15 Wa akaanu sannet
wa ardatu dannisit dol liré,
markabu igil dtiwaar dallil
wa igil shighil kibud it ide karre.
16 Daan shaqabu daane
kimma ghabaayil Israíil la biqidaam.
17 Daan arwe gabey gabbí
wa kukat af silal shikna
la faras kallex
ka la matstsiqinaayu gats xar waddigh.
18 Wo Rabbi,
ana mangafoka ittaake.
19 Gaad,
werrat lahaajumu
malliyom wa talliyom.
20 Nabra Ashiir saamdayit ta
wa ghadyaatu igil miluk taáfayid.
21 Naftaali shokan dtaaffat
wa willaad wajayib twallid.
22 Yusif qiccat gaamlat it qinat tu
ka qaghshuna raás xedtat amaadadat.
23 Malakfat ib girgirna barghaw ittu
wa ashim ib shirqinna darbu ittu.
24 Laakiin ghosu saabtat daaymat
wa jariidu xaadtidt
ib fadil ghidrat Daaghib Rabbi Yaqghub,
ibba fadilla Raaqi Matankab Israíil,
25 ib fadil Molaay abuka
la ib fadil Ghaadir sandakka
la ib barkat zilaam min laqal baarkakka
wa ib barakaat maay min ghuri midir
wa ib barakaat ziryat wa qadtaal wa qabaageq ib bizxe.
26 Barkotaat abuka minna barkotaatta adbir la ghadayim titfaddal
wa minna xaslat la qimir tsaagbat taxayis.
Illi killu it Yusif lixidar,
itta xaayissa xawu.
27 Wa Binyamiin kafaab mabghiyayit tu;
assibox ghitaal luxidt
wa amsuy la sillab kaafil.”
28 Illa killa ghabaayil Israíil la qasir kilé ta wa illa higya abuhom dolat baarakayom ta igil orohomka la barkat la titlaabannu.
Mot Yaqghub
29 Xaghohu wassayom wa bela,
“It ghirubaat qabayiye igil qarre tu.
Ka misil abawye itta baqat la itta garhat Qafrun la Xissaay ghibaruni,
30 bahalat la diib garhat Makfila la ghirub Mamra diib Kanqaan la Ibraahiim min Qafrun la Xissaay zaabaya misilla garhat jamqa igil tigbá.
31 Wa diiba Ibraahiim Saara issiitu dafna wa diiba Isxaagh wa Rifgha issiitu tghabbaraw wa Liá ma,
diiba ghabarkowa.
32 Wa mazzaabaayya garhat wa la baqat la qalat diiba minna Xissiyiin qala.”
33 Wa Yaqghub wassayot wilaadu kim atmama,
igaru itta qaraat kamkama wa arewex haba wa asik abawu taxayyaba.