50
Ka Yusif nafsu it abuhu adraba wa baka ittu wa saqamayu.
2 Xare Yusif la xakayim la kaddumu qalaw abuhu igil laxannidto ammarayom ka Yaqghub xannadtaw.
3 Wa illi qarbaqa amqil nasí wa hitan la qamqilotaat la igil atmamot xannadtot latxazya qalaya.
Wa la Masriyiin awid sabqa miqil wadaw ilu.
4 Wa amqilotaatta awid kim xalfaya Yusif igilla diibba ghasir Firqon qalaw belayom,
“Ib maqrufkum,
Firqon assiílo iyye wa bolu,
5 ‘Abuye amxalenni wa belenni,
“It ghirubaat igil itwaffe tu.
Ka diibba ghabir la diib arid Kanqaan igil noshshe xafarkowu ghibaranni,”
belenni.
Ka igil igiis wa abuye igil ighbar ajjiz iyye wa xare igil qaghbil.’”
6 Ka Firqon,
“‘Giis wa abuka ghibar kimma amxalekaata,’
bolu,”
belayom.
7 Ka Yusif abuhu igil lighbar gesa.
Wa killom maqewnat Firqon taalawu wa bedtratta ghasir wa sab gats Masir killom.
8 Wa bardu killom qad Yusif wa xawu wa qad abuhu taalawu.
Wa diib Jaasaan,
oro yaxadgaw imballa fadteymom wa la niwaayom.
9 Wa firsaan Masir wa qaskara gesaw baaku.
Ka la xashim sanni gaamil qala.
10 Wadna Adtaad la jafar Baxar Ordun dolat batsxaw,
ib gibí saamqat bakawu wa Yusif igil abuhu laaghis saamin alaghasa.
11 Ka la Kanqaaniyiin la ken xaadraam qalaw xiin la laaghis diib wadna Adtaad raáw belaw,
“Illi xazan daameq tu igilla Masriyiin.”
Wa la akaan la ghirub Baxar Ordun,
“Xazanna Masriyiin” samawa.
12 Ka wilaad Yaqghub wassiyat abuhom asfaw.
13 Ka asik arid Kanqaan nasáwu wa diibba baqat la diib garhat Makfila la ghirub Mamra la Ibraahiim misilla gharhat min Qafrun la Xissaay zaabaya dafnawu.
14 Wa Yusif abuhu xagho ghabra,
asik Masir qaghbala misil xawu wa killom la igil ghabiir abuhu gesaw goru.
15 Wa xaw Yusif mot abuhom kim raáw belaw,
“Lib Yusif aze igil liike itna ghaddir wa taratu itta saradt la wadenhu ittu litfadde itna.”
16 Ka laákaw ittu wa belawu,
“Abuka ghadam motu wassiyat xadga wa bela,
17 ‘Igil Yusif illa higya ballaghawu,
“Xasabka,
shakaf wa sixitaan xawka qaffe.
Hitom sanni saxataw itka.”’
Ka aze sixitaanna qaffena wa xina agbir Rabbi abuka xina.”
Ka illa zaqat waan batsxattu baka.
18 Xaghohu xawu matsáw wa ghadamehu harbadtaw wa belaw,
“Xina agbirka xina.”
19 Ka Yusif belayom,
“Iitifajjaqo.
Ana Rabbi ma ana ka qaaghbakkum?
20 La shar la intim ghasadkumu iyye,
Rabbi ker balsayu la yom gabbí halla igil laátmim igil najjayot arawex bizxit.
21 Ka sagá iitibalaw.
Intim wa wilaadkum ana imawnakkum.”
Ka dtamánayom wa albaabom qaghsana.
Mot Yusif
22 Wa Yusif wa killom dtewa abuhu diib Masir attamaskabaw.
Wa Yusif 110 sanat nabra.
23 Wa saalsaay gim min ziryat Afraayim raá wa bardu wilaad Maakiir wad Manassi,
naáyish inintom it xighfu litgassaw qalaw.
24 Xare Yusif igilla xawu belayom,
“Gidim mochche iitrayim.
Minnaata Rabbi igil masnadokum igil limtsá tu wa min illa ardat asikka ardat la Ibraahiim wa Isxaagh wa Yaqghub ib ghasam waqada ibba laáfagrakkum.”
25 Wa Yusif wilaad Israíil amxala wa belayom,
“Rabbi igil masnadokum igil limtsá tu ka min insar la qaacimye agqizo.”
26 Wa Yusif wad 110 sanat iníntu traxma.
Wa xannadtawu wa diib Masir diib taabut wadawu.