Gabbarot Israíiliyiin diib Masir
1
Illa asmaay wilaad Israíil la misil abuhom Yaqghub asik Masir naskaw ta,
orohomka misil dtewaahu:
2 Ruábiin wa Shamqun wa Laawi wa Yahuza
3 wa Yassaakar wa Zabulun wa Binyamiin
4 wa Daan wa Naftaali wa Gad wa Ashiir.
5 Talak Yaqghub diib Masir ib xibar sabqa nafar qalaw misil Yusif la badiir diib Masir qala.
6 Wa xaghohu Yusif wa killom xawu wa gimmom ib tamaamu tmaayataw.
7 Minnaata talakom,
la wilaad Israíil,
taánsasaw wa sanni zaraw wa yam alabom gabáw wa ardat Masir ibbom tmallaát.
8 Xaretaani diib Masir malik xadiis Yusif wa wadaddiitu la iilaámmir shiimat tsabdta.
9 Ka igilla shaqabu belayom,
“Ginxo ikkom wilaad Israíil akil ayi kim bazxawna wa daghghabawna.
10 Sittaat igil naáfgir halla inna min illi wa laqal igil iilibzoxo igil nikraqom.
Min tissarrar xarib min litgharrax,
misil abbachna inde sadaw igil lixirabuna wa minna balad igil lihirabo tu.”
11 Ka la Masriyiin la Israíiliyiin xante mattagbirat rebyat wadawom ib shighil igil lidhokom.
Ka igil Firqon kilé madiinat,
Fisum wa Raqamsiis,
igil kaziin mawan igil libnaw ghassabawom.
12 Laakiin akilla la Masriyiin ajáraw ittom,
twaasakaw wa tnashsharaw wa la Masriyiin fajjaqaw minnom.
13 Sababu la Masriyiin igil wilaad Israíil imbal raxamat ashghawom.
14 Mambaratom amraraw diibom ib raciigh kallaat wa wadi dtub wa ib shagaggiit biqidat diibba girah.
Wa illi killu imbal sema raáfat laáwadduwom tu qalaw.
15 Wa xare Firqon kilé immolid qibriyaat,
Shifra wa Fuqa,
ammara,
16 “Dolat la anis la Qibriyaat taáwalda qaghmitaahan la giriz tabqat min gabbí,
ghitalaahu wa ansat min gabbí,
izama minna.”
17 Laakiin jalla la kilé la immolid ferhiyaat Rabbi* qalaya,
amir malik Masir iidtayqaya.
Hitan la ma atbiqin ib xiyaayom xadgayaahom.
18 Ka malik Masir la kilé la immolid atlaaka wa saálayan,
“Igil mi kiína wadekin?
Igil mi la atbiqin ib xiyaayom xadagkinaahom?”
19 Ka la kilé la immolid balsaya,
“La anis la Qibriyaat kimsalla anis la Masriyaat iiko.
Hitan turudaat tan wa bagiid walda xina inde yiínbatsaxan.”
20 Ka Rabbi* itta kilé la immolid sana.
Wa la Israíiliyiin wasuk it qilib wa it daghib attalalaw.
21 Jalla la kilé la immolid ferhiyaat Rabbi* qalaya,
xattehanka qaylat baxaata habaya.
22 Xare Firqon killu shaqabu ammara,
“Kil giriz qibri tabqat,
diibba nahar likofu minnaata la ansaat ib xiyaayan atrufan.”