Manassi wa Afraayim
48
Wa xagho maddat,
Yusif,
“Waaldaayka ximum halla,”
tbahala.
Ka igil liráyu gesa wa wilaadu Manassi wa Afraayim nasá baaku.
2 Wa Yaqghub kabar matsí Yusif waldu dol batsxayu,
taqallata wa itta qaraat gissaayu gabá.
3 Ka Yaqghub igil Yusif belayu,
“Rabbi La Ghaadir diib Luz diib arid Kanqaan abhaza ichche wa baarakenni.
4 Wa belenni,
‘Igil afrekka wa abzaxakka tu wa mujtamaq shuqub igil ideka tu.
Wa illa ardat xaghoka igil talakka igil imannaxa tu kim milik iizawil.’
5 Biqid haye,
la wilaadka la diib Masir la ghadam mitsáchche asik insar zarekaahom wilaajje litxassabo.
Illi bahalat Afraayim wa Manassi igilye tom kimsal Ruábiin wa Shamqun.
6 Girraahom wilaad biqidaam min zarre,
igilka tom.
Wa ardom la warrusa ib simet Afraayim wa Manassi tgabbí.
7 La laátxazin min Birur Aaraam in qaghabbil,
Raaxiil diib arid Kanqaan twaffet it gabey in xina ghirub Afraata.
Ka diib ken ghabarkowa itta simidtdta silal Afraata” (la Bet Laxim titbahal).
8 Wa Israíil wilaad Yusif raá ka saála,
“Illom min tom?”
9 Ka Yusif it abuhu balsa,
“Hitom la wilaad la Rabbi insar razghenni tom.”
Ka Israíil bela,
“Qaghribannitom igil ibaarikkom.”
10 Wa raéy Israíil ib saba ibir dtaashish qala.
Ka Yusif la wilaadu ashága ittu ka saqamayom wa xaghfayom.
11 Wa Israíil igil Yusif bela,
“Gatska iré maslanni yaqala laakiin Rabbi wilaadka ma arénni.”
12 Xare Yusif min abraak Israíil warkayom wa sajda.
13 Wa Yusif ib maanu Afraayim nasá wa diggalab Israíil qabdtarayu wa Manassi ib shangabu nasá wa dimmaan Israíil qabdtarayu.
14 Ka Israíil ide maanu madda wa it raás Afraayim karaya hitu la niúsh indetu wa ide la galabu it raás Manassi karaya la bikir indetu,
bahalat la jareydu tkalafat.
15 Wa Yusif baaraka wa bela,
“Alho Rabbi la diib xiduru
abawye Ibraahiim wa Isxaagh qadtghaabalaw
wa alho la Rabbi la min kilghachche
wa asik yom raaqenni
16 alho hitua la min kil shar angafenni
illom wilaad wabaaraka.
Ka ib simechche
wa ib simet abawye Ibraahiim wa Isxaagh wassammaw
wa itta midir wabazxaw.”
17 Wa Yusif abuhu ide maanu it raás Afraayim karre waan raá tgaddá ka ide abuhu tsabdta min raás Afraayim asik raás Manassi igil laqaddiya.
18 Wa Yusif igil abuhu belayu,
“Iifaalka yibba,
illi tu la bikir;
maanka it raásu kiraya.”
19 Ka abuhu aba wa bela,
“Walye,
ana aamir halleko.
Hitu ma,
ammir shaqab wa baqal simet kim gabbí.
Laakiin la xuhu la niúsh minnu lishsarraf gabbí wa la talaku jamaaqat umam gabbó.”
20 Wa itta amqil laha baarakayom,
“Wilaad Israíil simetkum igil barkat raffiqiwa
wa liblo,
‘Rabbi kim Afraayim wa Manassi lideka.’”
Ka Afraayim ghadam Manassi ghaddama.