Kaasatta Fiddat
44
Wa Yusif wakiilla daar ammara wa belayu,
“Shiwaalaatta sab nabra milá asikka qisra wa fiddat orohomka diibba affa shiwaalu kiraya.
2 Wa xare,
la kaasachche la fiddayit diibba affa shiwaalla niúsh misilla fiddatu la qawilla shirnaay kiraya.”
Ka kimma Yusif belayuta wada.
3 Wa dol tsabxa igilla sab adugom inde nasáw igil ligiiso azmaw minnom.
4 Wa laakiin,
minna madinat figir waan belaw,
Yusif igilla wakiilu belayu,
“Agiidka la sab qarre wa dol taqarre ibbom ballom,
‘Igil mi sannet ib ikkiit fadekum?
5 Jalla mi la kaasat la mambaaye satte ibba wa it qilim gheb litnaffaq ibba saraghkuma?
La wadekuma,
makrahat ta.’”
6 Ka kim qarrayom nafsa la zaqat belayom.
7 Ka belawu,
“Mambaaye igil mi kiínna libil?
Minína wa ken agbirka illa iiwaddu!
8 Xina la fiddat la diibba afachcha shiwaalaatna rakabnaaha min balad Kanqaan balasnaaha itka.
Ka igil mi fiddat aw dahab min daar mambaaka insarrigh?
9 Ayi minína agbirka la kaasat tsannex goru igil limut tu.
Wa xina ma,
agbir mambaaye ingabbí.”
10 Ka belayom,
“Attafaghna kimma belkuma tigbá.
La kaasat latitrakkab baaku,
gabirye gabbí,
wa la biqidaam litbarró.”
11 Ka orohomka agiid shiwaalu it arid kara wa kastayu.
12 Ka la wakiil taftiish astabda wa ibba shiwaalla qabi ambata wa ibba shiwaalla niúsh kallasa.
Wa la kaasat diib shiwaal Binyamiin rakbaya.
13 Wa libbaasom saadtaraw wa shiwaalaatom it adugom tsaqanaw wa asikka madinat qaghbalaw.
14 Wa Yusif lissaq diibba daar qala.
Wa Yahuza wa xawu xiin qaghbalaw,
ghadamehu itta arid harbadtaw.
15 Ka Yusif belayom,
“La wadeku ma,
mi ta?
Intim iitámraw inaas kimsaleye ib qilim gheb la jarre kim kashshif?”
16 Ka Yahuza,
“Igil mambaaye mi niballu?
Wa kafo nithaage?
Wa nafisna kafo nibarrí?
Rabbi jariimatna fadxa.
Ka aze,
xina wa la kaasat trakkabat goru,
agbir mambaaye xina.”
17 Ka Yusif bela,
“Xasha wa kalla kiínna igil ide!
La inaas la kaasat rakabna mislu,
hitu tu bas la gabirye gabbí.
Intim laata,
ib salamat asik abukum giiso.”
18 Ka Yahuza asku ghaddama wa belayu,
“Mambaaye,
ib maqrufka,
gabirka zaqat igil libal ajjiz ilu,
wa it gabirka iitxiragh.
Inta it sildtat sinnat Firqon in inta.
19 Mambaaye agbiru saála,
‘Ab aw xu bikum?’
20 Ka imbe,
‘Ab diglal bina wa wal niúsh it qibinaahu la waldayu bu.
Wa xuhu twaffa,
ka hitu bannu tarfa min immu wa abuhu fattiyu.’
21 Wa igil agbirka tibe,
‘Igil iráyu amtsíwu.’
22 Ka igil mambaaye imbellu,
‘La xitsaan abuhu igil lixidag iighaddir wa min laxaddigu,
abuhu mayit.’
23 Ka igil agbirka tibe,
‘Xukum la niúsh min iimatstsí gokum,
dol xaariit it gacce iitigabaó.’
24 Ka waan asik gabirka abuye qaghbalna,
ib ghol mambaaye asaálnaahu.
25 Ka abuna belenna,
‘Qaghbilo wa gale munat zaabaw.’
26 Ka imbellu,
‘Ken igil nigiis yiínghaddir la xuna la niúsh min iilahalle gona jalla gatstsa inaas igil nigbá yiínghaddir xuna baakna min iilaxaddir.’
27 Ka gabirka abuna belenna,
‘Intim faghdaw issichche kilót wal kim waldat iyye.
28 Wa orohom min goye fagra wa caarama ibe wa asik aze qin iikareko ittu.
29 Ka illi min nassó minye wa min litázze diib ibirye kim ib gham imayit twadduni.’
30 Ka aze asik gabirka abuye min qaghabbil imballa xitsaan wa tinfaasu gor illi xitsaan tu
31 ka la xitsaan kim yahalla waan liré diib ibru ib xasareb igil limut tu.
32 Jalla gabirka damiinna xitsaan ana,
igil abuye ibellu,
‘Min yiíballissu itka,
qimirye killu it xaghka qidduy igabbí.’
33 Ka mambaaye itrajje,
insar igil ittaake igil liízam minye wa gabir igil mambaaye igil igbá bidaalla xitsaan.
Wa hitu misil xawu igil laqaghbil ajjiz ilu.
34 Ka min kaho asik abuye qaghabbil wa la xitsaan baakye indi iiko?
Ana abuye it xasaar igil iré yiíkhil.”