La Rixilat la Kaaláyit
43
Wa la safra sanni makrahat qalat diibba balad.
2 Ka killu la shirnaay la min Masir amtsáwu kim waxaw,
abuhom belayom,
“Tiwallabaw wa nabra zaabaw inna.”
3 Ka Yahuza belayu,
“La inaas ib saakik yammamenna wa belenna,
‘Xukum mindi iitaámatstsó gokum,
it gacce iittigbó.’
4 Ka nadákhu misilna min geé,
niddarre wa ghut nizaabe ikka.
5 Wa min iitnaddú igil nigiis iiko jalla la inaas,
‘Xukum mindi iijalbo,
it gacce iittigbó,’
belenna.”
6 Ka Israíil belayom,
“Jalla mi illa siddit sababkum iyye wa igilla inaas,
‘Xu biqid bina,’
telkumu?”
7 Ka balsaw ittu,
“La inaas ib ashaxalalot saálenna ib qaylatna wa ib nosna.
Wa ‘Abukum it iddinya halla?
Wa xu biqid bikum?’
Xina itta saálaatu balasna wa bas.
Xina mi atámarenna,
‘Xukum insar amtsó,’
kim igil libalanna tu?”
8 Xarteni Yahuza igil abuhu belayu,
“La xitsaan nidá goye wa azetaay xina wa inta wa wilaadna kilna xayot igil nirkab wa min mot igil nittarxe.
9 Ana idamminu wa masúleyatu qiraffeq.
Min yiíballissu itka ghadameka min yaqabadtdtiru,
qimirye ib riimu it xaghka qidduy igabbí.
10 Ka itta giyaas xar-xar min yiímbil,
kilé igir wasaafarna.”
11 Ka abuhom belayom,
“La giyaaskum iitarrif min geé,
illi la talle widaw.
Igilla inaas hiidat nisó gokum.
Diibba agribatkum la sana minna ardatna taáfarriyu kiraw:
gale min balsam wa maqar wa gale bahaaraat wa mur wa fustugh wa loz.
12 Wa qidtiffa fiddat nisó baakkum la fiddat la diiba afachcha shawaalaatkum igil tiblaso ittom,
laqaghbalota imbal ghasid min laqale.
13 Wa la xukum bardu nisíwu gokum wa ib shafaag asikka inaas twallabo.
14 Alho Rabbi La Ghaadir waárxamayu itkum wa igil la biqid wa igil Binyamiin misilkum igil laqaghbilo waájjaza.
Wa wilaajje igil itmalladt xikum ichche min lahalle itmalladtdtom.”
15 Ka la sab la hiidaat wa qidtiffa fiddat wa Binyamiin nasáw mislom wa ib shafaag asik Masir taharbabaw wa it gats Yusif gabáw.
16 Ka Yusif Binyamiin gorom kim raá,
igilla wakiilla daaru belayu,
“Illom sab asik bechche nisóm wa xirud xirad wa tsabex addale jallaab misilye igil litstsabbox gaáw.”
17 Ka la inaas kimma Yusif belayuta wada wa la sab asik daar Yusif nasá.
18 Asikka bet kim nasáyom,
sanni farhaw wa it nafsom belaw,
“La sabab la ittilla amtsaáwna ibbu la fiddat la itta igir la ghadamiit diibba shawaalaatna qaghbalat tu.
Igil lihijam itna wa lighlabanna wa ligabranna wa itta adugna igil laástawle tu.”
19 Ka asik wakiil Yusif gesaw wa itta affa bet assaálawu wa belawu,
20 “Inta qaffennaata,
sayid.
Xina la maddat la ghadaamiit asik insar darrena munat igil nizaabe
21 laakiin dol igil nitmaye karena oronaaka fiddatu ib wazna taamim diibba affa shiwaalu rakba.
Ka misilna insar amtsánaaha.
22 Wa baakna fiddat biqidat ma amtsána nabra igil nizaabe.
La fiddat min diibba shiwaalaatna karaya,
yaáamarna.”
23 Ka belayom,
“Ghisano wa iitifraho.
Rabbikum wa Rabbi abukum diib shawaalaatkum kaniz habekum.
Wa fiddatkum batsxattanni.”
Wa Shamqun afgara ilom.
24 Ka la wakiil la sab daar Yusif aatayom wa maay habayom igarom igil lixitsabo wa qalaf igilla adugom.
25 Wa hiidaatom addalaw ib saáyat matsí Yusif it addihir jalla ken igil libloqo tu samqaw.
26 Yusif itta bet waan matsá,
la hiidaat la asikka daar amtsáwa ghaddamaw ilu wa sajdaw.
27 Ka ib xaalatom saálayom wa xare bela,
“Abukum la kejar la ilu tibaw,
kafo halla?
Hitu it wad wallaqal halla?”
28 Ka belaw,
“Gabirka abuna it xayot halla wa hitu bakiit tu.”
Wa sijud xishmat sajdaw ilu.
29 Wa twallaba ka xuhu la shagiigu Binyamiin raá.
Ka belayom,
“Illi la xukum la niúsh la ilu telkuni tu?”
Wa bela,
“Rabbi libaarkakka,
walye.”
30 Wa Yusif asik akaan la itta bakke shafga jalla waan xuhu raá,
mashaaqiru tkokasat.
Ka asik odatu la baxaatu gesa wa diiba baka.
31 Wa xare gatstsu xatsba,
wa fagra ittom wa minna bikaay nafsu tsabdta wa bela,
“La nabra amtsó.”
32 Ka bannu karaw ilu wa igilla xawu bannom wa igilla Masriyiin la itta walimat qizumaam qalaw bannom jalla la Masriyiin billaq misil Qibraani xaraam massillom qala.
33 Wa xaw Yusif xasabba qamaarom ghadamehu atgaasaw minna bikir asikka wadda xiddagaat wa xid ghilic belaw ib qajbe.
34 Wa min dtarabezat Yusif xazwaat maadtawom ka xazot Binyamiin ib xamis qidtif min killom zedat.
Ka mislu balqaw wa sataw wa trayxaw.