Xilim Firqon
41
Xagho kilé sanat ib gidiidan,
Firqon xilim raá.
Wa itta dtaraffa Niil baadtir iníntu
2 minna nahar saboq waát riduyaat wa xawayis fagraya wa itta qalmat laásqira astabdaya.
3 Wa xaghohan,
minna nahar saboq kalayil wa hamayir fagraya ka jafarra waáatta salif badtraya itta nagebba nahar.
4 Wa illan waáat la kalayil wa la hamayir la saboq la waáat la wajayib wa la xawayis balqaya.
Wa Firqon min sikaabu xasosa.
5 Wa kaalí waan tahargata wa xilim kaaláay taxallama.
Saboq fariikaay cangalala wa faaryaam wa min xatte birik naabtaam raá.
6 Wa xaghohom,
saboq fariikaay biqidaam carammidt bandtalos xushushom baghlaw.
7 Wa la fariik la carammidt la saboq la fariikaay la bishulaam wa la faaryaam waxadtaw.
Wa Firqon min sikaabu fazqa.
Wa xilim kim tu fahama.
8 Wa assibox,
Firqon gaha wa killom shaxarattiit Masir wa xikamaaha tlaaka wa la xilmu dagma ilom,
wa oro igil lifassiru ilu iighadra.
9 Ka raíissa mastiyat igil Firqon belayu,
“Yom xiwinaaye faghadko.
10 Firqon it kilót gabru ghadba,
ka iyye wa la raíissa maángirat diibba daarra raíissa xaras xabsa.
11 Wa oronaaka it xatte laali xilim taxallama,
xilimka tafsiiru qala iglu.
12 Wa mandalaay Qibraani,
gabirra raíissa xaras qala gona ka la xalamaatna assaálnaahu wa fassarayom inna xilimka tafsiir fintuy qala ilu.
13 Wa itta tafsiiru la belennaatu bayaan tbayana inna,
ana it wazifachche twallabko wa la inaas la biqid taqaadama.”
14 Ka Firqon it Yusif laáka wa agiidaay amtsaáwu minna sijin.
Xagho tlaadta wa libbaasu ghayyara,
ghadam Firqon badtra.
15 Ka Firqon igil Yusif belayu,
“Xilim taxallamko wa la fassirru iitwajjada.
Wa inta ayi xilim lassammuqu tfassir samqako.”
16 Ka Yusif it Firqon balsa wa bela,
“Ana ittilli fadil alabye.
Rabbi tu la igil Firqon baliis lahayib wa ladtamínnu.”
17 Ka Firqon igil Yusif belayu,
“It xilimye,
itta nagebba Niil ibadtdtir qalko.
18 Wa minna nahar saboq waát xawayis wa wajayib fagraya wa itta qalmat igil laqasqira astabdaya.
19 Wa xaghohan,
saboq waát biqidaat hamayir wa marra kalayil wa shalxiit minna nahar awalwalaya.
Wa it Masir it ikiínaahan la massillan iireéko.
20 Illan waáat la shilxaat wa la maábbey la saboq la waáat la salfaayaat la rishshudaat ghaxmaya.
21 Wa min ma balqayahan riiyatan iitbaddalat ibbaaha mabaddal ininta attalalet.
Wa xare min sikaabye fazqako.
22 Wa xaghohu,
it xilimye saboq fariikaay gaamlaam wa sanniyaam wa min xatte qagebat naabtaam reéko.
23 Wa xaghohom,
saboq fariikaay biqidaam cibuluyaam wa cirumudtaam la bandtalos xashashayom baghlaw.
24 Wa la fariik la ghamammic la saboq la fariikaay la faaryaam waxadtaw.
Wa illi igilla shaxarattiit dagamkowu minnaata la fassirru iyye saánko.”
25 Ka Yusif igil Firqon belayu,
“Xalaamaat Firqon,
kilíitom xatte tom.
Rabbi igil Firqon la igil lidayu tu kashfa.
26 La saboq waát la sanniyaat,
saboq sanat tan,
wa la saboq la fariikaay la faaryaam,
saboq sanat tom,
wa la kilót la xilim xatte tom.
27 Wa la saboq waát la shalxiit la jayayin la asaran fagraya,
saboq sanat tan,
wa la ma,
saboq fariikaay la ibba haalom la bandtalos andadayom,
saboq sanat naay joq tom.
28 Ka kimma igil Firqon ibella,
Rabbi igil Firqon la igil lidayu tu qallana.
29 Diib Masir saboq sanat marra raashshaat igil limtsá tu
30 wa xaghohan,
saboq sanat ib safraahan.
Ka la addaam killa rahayat Masir igil litrassaqo tu wa la joq la balad killa laátallif.
31 Ka roy la rahayat Masir iifaghghid sabab la safra la asara tmatstsí,
sanni saarqat ta.
32 Wa la sababba daagamotta xilim kilé dol igil Firqon jalla la amir min Rabbi taámmama tu wa Rabbi it bagaayid igil laájriyu tu.
33 Sababu,
Firqon inaas baqal basar wa xikmat igil laásarbib bu,
tadbiir shuún Masir igil laádtdtawirru.
34 Firqon wikalá likallif diib Masir ximmisiitta ittey igil lijmaqo itta sanotaatta zaaydat la saboq.
35 Wa ghutta sanotaatta rahayat latmatstsí igil laákkibo wa la shirnaay xante sildtat Firqon igil likzano diibba madayin munat ikkibit igil tahalle.
36 Ka munat illa igilla modaay ta dolatta sanotaatta majaqat la Masir aammat hallet igil la balad ib safra igil iilihilak.”
37 Wa Firqon wa meqewnattu la sittaat sannet treéttom.
38 Wa Firqon belayom,
“Kimsal illi inaas rox Rabbi bigoru inrakkib?”
39 Wa Firqon igil Yusif belayu,
“Jalla Rabbi illi killu atámarekka,
baqal bisaarat wa xikmat kimsalka yahalla.
40 Inta madabiraay roshaanye tgabbí wa killu shaqabye igilka dtayeq.
Wa millaqalka oro iilahalle imbaleye la baqalla qarish.”
Wilaayat Yusif
41 Wa xare,
Firqon igil Yusif belayu,
“Ana waali diib Masir killa shayamkoka.”
42 Wa asaru,
Firqon kaatmu xardta wa Yusif sargaya wa balaliit kattaan qiggil albasayu wa silsilat dahab it sigaadu asra.
43 Wa markibat naayib Firqon atstsaqanayu wa matlaakyaay ghadamehu litlaake qala wa libil,
“Gabey qarxu illu!”
Wa kiínna waali diib killa Masir shayamayu.
44 Wa Firqon igil Yusif belayu,
“Ana la Firqon ana.
Wa imbal iijazatka inta diib killa la ardat Masir kirit laraffeq alabu.”
45 Wa Firqon Yusif Safanaat Faqniix sama wa Asnaat walat Fudtifaaraq kaahin On athadayu.
Wa sildtat Yusif diib killa Masir tmaddadat.
46 Wa Yusif wad salaasa sanat qala waan kidmat Firqon malik Masir baashara.
Wa amxabarot misil Firqon qarxa wa safar diib killa ashnaak Masir astabda.
47 Wa la arid ittey waajid habat xiinna sanotaatta rahayat la saboq.
48 Ka Yusif killu la ghut la Masir aatettu diibba sanotaatta rakabeb la saboq wa diibba madayin kaznayu.
Wa diib madinatka itteyya girah laájfura washshagha.
49 Ka Yusif yam alabu shirnaay akil xotsa ragragat kazna asik xassabotu atkaarama jalaab min xisaab xalfa.
50 Wa Asnaat walat Fudtifaaraq kaahin On kilót wal waldat igil Yusif ghadamma sanotaatta joq.
51 Ka Yusif la bikru Manassi samayu jalla bela,
“Rabbi killa jirbachche wa qaylat abuye atnassenni.”
52 Wa la kaaláay,
Afraayim samayu jalla bela,
“Rabbi mafriyaay wadenni diibba ardat la diiba matsatsko.”
53 Wa sanotaatta rakabeb la saboq xalfaya
54 wa sanotaatta joq la saboq daggaya kimma bahalat Yusif.
Wa diib killa la amaddir la biqid safra qalat wa diib Masir laata,
tsigaab.
55 Waan Masir ibba joq shaqarat,
la shaqab asik Firqon waqa jalla nabra.
Ka Firqon igil killom la Masriyiin belayom,
“Asik Yusif giiso wa la liblakkum tu widaw.”