Yaqghub asik Betíil laqaghabbil
35
Xare Rabbi igil Yaqghub belayu,
“Kamkam asik Betíil giis wa ken amaskib wa ittaaka wacam ghurbaan waccim igil Jaliil la min xuka Qiisu in taharrib abhaza itka.”
2 Ka Yaqghub igil dtewaahu wa killom la qalaw goru belayom,
“Minna asnaamma gaana la hallet baakkum ide nigafo wa lidtxo wa libaaskum ghayiro.
3 Asaru asik Betíil nigiis wacam ghurbaan igil ashnin igil Rabbi litxiin kirbachche farrajenni wa la itta kidkuwa misilye qala.”
4 Ka killa la asnaamma gaana la qalat baakom igil Yaqghub sallamawa wa la azimmat la itta izanom qalat ka xantela balludtat la it Shakiim titrakkab dafnaya.
5 Ka xare gaqazaw wa Rabbi sabba madayin la ajfurom qarghagha ka yaqarrawom.
6 Wa Yaqghub wa killom la qalaw mislu it Luz (bahalat Betíil) la it ardat Kanqaan titrakkab matsáw.
7 Ka diiba wacam ghurbaan qabdtara wa la akaan Maqbud Betíil samaya jalla Jaliil diiba traáyu min xuhu in sakke.
8 Wa Dabura sedyayit Rifgha ken twaffet wa xantela balludtat la it hinú Betíil tdaffanat.
Ka Balludtat Bikaay sammet.
9 Wa Yaqghub xagho min Birur Aaraam qaghbala Jaliil ib xadiis azhara ilu wa daxarayu
10 wa belayu,
“Sametka Yaqghub qalat,
laakiin girra illa,
Yaqghub igil titbahal iiko,
Israíil indi iiko.”
Ka Israíil samayu.
11 Wa Rabbi belayu,
“Ana Rabbi La Ghaadir ana,
fire wa zire.
Inta ummat simiit igil tigbá tu,
umam waasqat ma.
Wa min talakka miluk igil lifgaraw tu.
12 Wa la ardat la igil Ibraahiim wa Isxaagh mannaxakowa,
igilka ma mannaxakokaata wa igil ziryatka xaghoka.”
13 Xare Jaliil minna akaan la Yaqghub tahaaga itta gesa.
14 Ka Yaqghub taakyaat imin watda itta akaan la Rabbi tahaagayu itta ka mastay balsa itta kim ghurbaan igil Rabbi wa zed zeytun ma balsa itta.
15 Wa Yaqghub la akaan Betíil samaya,
bahalat “Bet Rabbi” jalla Rabbi itta tahaagayu.
Mot Raaxiil wa Isxaagh
16 Xaariit min Betíil naghalaw wa min Afraata nasaafat inintom,
Raaxiil mixits astabdet wa mixitsa taxashkaba.
17 Wa it cafir inde hallet la immolid telatta,
“Iitirghaghi!
Illi wal biqid tu.”
18 Raaxiil it sakaraat ininta,
laakiin arwaxa in tannin,
la giriz Bin Uni samettu,
(bahalat “Wad Aniinye”).
Abuhu laata,
Binyamiin samayu.
19 Ka Raaxiil twaffet wa it gabey Afraata (bahalat Bet Laxim) tghabbarat.
20 Wa Yaqghub taakyaat atka it ghabra wa asik illi waghit gona,
ib taakyaat ghabir Raaxiil litámmar.
21 Wa Israíil heraaru attalala wa it miqiddaay Iraara Qidar kara.
22 Israíil la mandtighat laha saakin indetu,
Ruábiin naawala wa Bilha tsibdtit abuhu jaamqa wa Israíil ibba amir samqa.
Wa wilaad Yaqghub qasir kilót qalaw.
23 Wilaad Liá:
Ruábiin bikir Yaqghub,
wa Shamqun wa Laawi wa Yahuza wa Yaskaar wa Zabulun tom.
24 Wa wilaad Raaxiil:
Yusif wa Binyamiin tom.
25 Wilaad Bilha,
waddayit Raaxiil:
Daan wa Naftaali tom.
26 Wilaad Zilfa waddayit Liá:
Gaad wa Ashiir tom.
Wa illom wilaad Yaqghub la it Birur Aaraam zarayom tom.