Yaqghub min Laabaan Laharrib
31
Yaqghub wilaad Laabaan,
“Yaqghub killu maal abuna nasá wa killa la akyaaraat min amlaak la abuna jamqaya,”
inliblaw samqa.
2 Yaqghub bardu min atwaayana Laabaan ib qin badiiru gannoxu iiraáyu.
3 Ka Rabbi igil Yaqghub belayu,
“Asik balad abawka wa qadka qaghbil wa ana goka ana.”
4 Ka Yaqghub it Raaxiil wa Liá laáka wa asikka ghatra la itta qabaagqu lawqil qala tlaakayan.
5 Wa belayan,
“Wajih abukin jahatchche kimma maale wa la ghadam laqalaya litreénni yahalla.
Minnaata,
Rabbi abuye misilye qala.
6 Wa intin taámra abukin kafo min libye shagekowu.
7 Abukin laata,
kayanenni wa kiraayye qasir dol baddala,
ligbá ma indi iiko Rabbi xigeye gabá.
8 Ka dol ‘Kiraayka la kawakkib tan,’
belenni,
killu la salif kawakkib waalada wa,
‘Qedabitaat,’
waan bela,
killu la salif qadabitaat waalada.
9 Ka Rabbi tawaab abukin nasá wa iyye habayu.
10 Wa itta xiinna mathabbaabba qadtaal,
xilim taxallamko.
Wa diibu la dabaliit la qedabiitaat wa la kawakab wa la xanaggir la qadtaal in tahabbib reékowa.
11 Wa malaak Rabbi diib xilim,
‘Wo Yaqghub,’
belenni.
Ka,
‘Labbek,’
ibellu.
12 Ka bela,
‘Ginax,
killa la dabaliit la qedabiitaat wa la kawakab wa la xanaggir la qadtaal in tahabbib igil tiré tu sabab killu Laabaan la wadekaatu reéko.
13 Ana Rabbi la it Betíil abhazko itka ana dolat la itta taakyaat zed balaska wa waqad waqadkanni.
Aze haye min illi balad gaqaz wa asik baladka qaghbil.’”
14 Ka Raaxiil wa Liá belaya,
“Xina it amlaak abuna wiris alabna.
15 Hitu yaágonena wa yiázbenna wa qawilna iibalqa?
16 Ka killa la akyaaraat la Rabbi abuna attagalgalaya,
igilna wa igil wilaadna ta.
Jalaab illi,
Rabbi labelekkaatu,
killu wide.”
17 Ka Yaqghub wilaadu wa ansu it agmaal tsaqanayom.
18 Wa killa la aslafaatu la diib Birur Aaraam la afraya gelala wa asik abuhu Isxaagh it arid Kanqaan twajjaha.
19 Wa Laabaan qabaagqu igil licaggir gaayis iníntu,
Raaxiil asnaamu sarghat.
20 Wa bardu Yaqghub Laabaan la Aaraamitaay ghashsha wa kim igil ligqaz tu iiballaghayu.
21 Ka ibba butta harba wa Baxar Furaat taqaada wa jahat aawaas Jilqaad wajjaha.
22 Wa it saalis amqil,
Laabaan Yaqghub kim sharda daggama ilu.
23 Ka aghaarbu nasá mislu wa maddat saamin Yaqghub atásara wa it aawaas Jilqaad qarrayu.
24 Itta laali laha,
Rabbi diib xilim it Laabaan la Aaraamitaay matsá wa belayu,
“Awwaqka!
Yaqghub naghghim ib ikkiit ligbá aw ib sannet.”
25 Wa Yaqghub kematu itta os waatid iníntu diib Jilqaad,
Laabaan qarreyu wa hitu ma wa aghaarbu kematom ken watdaw.
26 Wa Laabaan igil Yaqghub belayu,
“Mi wadeka?
Inta kadqakanni wa awaalijje kimsal maxbusiin xarib gelalka.
27 Igil mi kadqakanni wa ib sir sharadka?
Igil mi iiballaghkanni?
Ib ixtifaal wa xilaay wa singhay wa ib dallukat wa qud wasaaraxkoka!
28 Intaadi awaalijje wa wilaadan ma,
igil iwaadeq fursat yahabkanni.
Widiit gilul wadeka.
29 Wajarxakokum qalko laakiin Rabbi abuka liliit belenni,
‘Igil Yaqghub ikiit wa sannet iitiblas.’
30 Biqid haye,
fahamko inta jalla daar abuka saflalka giska.
Wa laakiin,
jalla mi asnaamye saraghka?”
31 Ka Yaqghub balsa ittu,
“Ana awaalidka ib jabir igil iitinsá minye farhako.
32 Laakiin asnaamka la kassis la nasáyom,
mot ganoxu.
Ghadam aghaaribna ginax wa naayka min bigoye nisá.”
Wa Yaqghub Raaxiil la asnaam kim sarghat aamir yaqala.
33 Ka Laabaan kemat Yaqghub wa kemat Liá wa kematta kilé amat ata wa sema iirakba.
Ka min kemat Liá fagra wa kemat Raaxiil ata
34 wa Raaxiil la asnaam inde nasát xanna karij xabaqattom wa tgasset ittom.
Wa Laabaan killa la kemat fattasha wa xatte iirakba.
35 Ka igil abuha telattu,
“Yibba,
iitxiragh ichche sabab sinnat biichche ghadameka igil ighnats yiíghaddir.”
Wa Laabaan xagho kil gaá fattasha la asnaam iirakbaya.
36 Ka Yaqghub ghahara wa Laabaan qatqagaba wa belayu,
“Zanibye wa shakafye mi tu?
Igil mi malekanni?
37 Inta intilye lagaá killu fattashka,
min naayka tu mi rakabka?
Min rakkib,
ghadam aghraabye wa aghraabka kirayu igil lixikamuna.
38 Diib 20 sanat la kalákiwan misil qadtaalka wa qabaageqka yaqatghaalqaw.
Wa minna salifka,
oro ma madaf iibalqako.
39 Ana iggir amtsú ikka yaána wa noshshe ikassirra qalko.
Wa taqawiid sirghat amqil wa laali,
dtallib minye qalka.
40 Min gats amqil tsaxaay tlallaqanni qalat wa min gats laali asxayta tghardtidtanni qalat wa tirhaan nasénni.
41 Qisra sanat kaláko goka,
qasir qarba sanat awaalidka igil iksab wa sis min ajilla aslafaat.
Wa ittilli waghit ib gidiidu kiraaye qasir dol baddalka.
42 Rabbi abuye Ibraahiim,
la Isxaagh farruhu misilye min iilaqale imbal shak ib haalye wanadákanni.
Laakiin Rabbi taqabye raá ka liliit nahareka.”
43 Ka Laabaan igil Yaqghub belayu,
“La awaalid awaalijje wa wilaad wilaajje wa aslafaat aslafaachche.
Killu latiríyu halleka,
intilye tu.
Minnaata,
awaalijje wa qiyaalan,
mi ibassirran?
44 Naqa,
ana wa inta galad niide fingena shaahud igil tigbá.”
45 Ka Yaqghub imin nasá wa taakyaat qabdtaraya.
46 Wa igilla aghaarbu,
“Iman jimqo,”
belayom.
Ka iman jamqaw wa kawamawu wa xaghohu ittaahom balqaw ghirubba kom.
47 Wa Laabaan wa Yaqghub kom shahaadat samawu orohomka kimma laghwatu.
48 Wa Laabaan bela,
“Illi kom yom fingena lishhid.”
Sabat illi Kom Shahaadat aw Galad lissamme.
49 Wa bardu Masfaat samma jalla Laabaan bela,
“Rabbi maraghbaayna ligbá waan min xid masaafat ingabbí.
50 Awaalijje ib kelmiit min titghaarax aw tahadde ittan,
oro ma iilahalle gona indi iiko,
Rabbi fingena kim lishhid igil tifghad bika.”
51 Wa Laabaan igil Yaqghub belayu,
“Illi la kom wa illa la taakyaat la fingena qabdtarkowom tom.
52 La kom wa la taakyaat mafghidat tom igil inde kidkowom igil yiímadrirrakka wa inde kidkaahom iitimadriranni.
53 Rabbi ilaah Ibraahiim wa aalihat Naaxur wa abawu fingena lixkamo.”
Ka Yaqghub ibba Rabbi la Isxaagha farruhu maxala.
54 Wa ittaahu itta dabir karamat karrama wa aghraabu tlaaka igil libloqo.
Ka balqaw wa itta dabir tmayaw.
55 Wa Laabaan guxat xasosa wa awaaldu wa qiyaalan saqama wa baarakayom.
Wa darbu asik daaru seyyaba.