30
Raaxiil igil Yaqghub igil tilad kim iighadrat min xitta ghanát wa igil Yaqghub telattu,
“Willaad min iitahaybanni igil immut tu.”
2 Yaqghub it Raaxiil ghahara wa belaya,
“It akaan Rabbi la willaad tsabdta minki iitximayni.”
3 Ka balsat,
“Illa waddayichche Bilha ta.
Ite itta willaad igil tilad iyye wa ibba qaylat igil irkab.”
4 Raaxiil waddayita kim issiit wahabat ilu wa ata itta.
5 Ka Bilha min Yaqghub qamsat wa xitsaan waldat.
6 Ka Raaxiil tibe,
“Rabbi daana iyye wa kirinche samqa wa wal razghenni.”
Sabab illi Daan samettu.
7 Bilha waddayit Raaxiil xare ma,
qamsat wa igil Yaqghub wal kaaláay waldat.
8 Xaghohu Raaxiil tibe,
“Did xichche kifax sidud kaafxako wa tnassarko.”
Sababu Naftaalia samettu.
9 Liá min willaad kim badtrat dol aamarat,
Zilfa waddayita nasát wa igil Yaqghub habatta issiit igil tigbá ilu.
10 Asaru Zilfa waddayit Liá igil Yaqghub xitsaan waldat.
11 Ka Liá,
“Akil ayi baqal gad ana,”
tibe.
Wa Gaad samettu.
12 Xare ma,
Zilfa waddayit Liá wal kaaláay waldat igil Yaqghub.
13 Wa tibe,
“Yebu sirurye!
Jalla illi la anis baqal sirur igil libalanni tu.”
Ka Ashiir samettu.
14 Wa itta iinna batiikka shirnaay,
Ruábiin jahatta girah fagra wa gale nabaat luffaax rakba wa igil immu Liá jalbayu.
Ka Raaxiil telatta,
“Ib maqrufki,
minna luffaaxla walki habini.”
15 Ka Liá telatta,
“Iikaffekki biíshshe nasáki minye?
Luffaaxla walye ma,
igil tinsiíyu minye tu ma mi?”
Ka Raaxiil telatta,
“Ila min geé,
yom goki liskab bidaalla luffaaxla walki.”
16 Ka Yaqghub amsuy minna garhat waan qaghbala,
Liá igil titghaballu fagrat wa belattu,
“Yom laali baakye sakkib,
ajil ib luffaax walye tkaarekoka.”
Ka la laali laha gora sakba.
17 Wa Liá Rabbi samqa minna wa igil Yaqghub wal xaamsaay waldat ilu.
18 Wa xare Liá tibe,
“Rabbi siqir fadenni sabab waddayichche igil biíshshe kim issiit habko.”
Wa Yaskaar samettu.
19 Wa Liá ib xadiis qamsat wa igil Yaqghub wal susaay waldat.
20 Ka belat,
“Rabbi wahabat ghaalyat wahabenni.
Aze biíshshe taghiranni sabab sis wal waladko ilu.”
Wa Zabulunb samettu.
21 Wa asaru,
walat waldat wa Diina sametta.
22 Wa xare,
Rabbi Raaxiil faghda wa astajaaba igla wa rixima fakka.
23 Ka qamsat wa xitsaan waldat.
Wa tibe,
“Rabbi la qaar ghandtadta minye.”
24 Wa Yusifc samettu.
Wa tibe,
“Rabbi,
wal biqid waskanni.”
Yaqghub Ib Xaghghu Litstsabbadt
25 Raaxiil Yusif dol waldat,
Yaqghub igil Laabaan belayu,
“Asik akaanachche wa ardachche saarxanni.
26 Anishshe wa qiyaalye la jaliibom kadamkoka salmanni igil issayab sabbat mi kidmat kadamkoka tifhim.”
27 Ka Laabaan belayu,
“Min radde ichche goye igil tixidar,
itkattalakka jallaab addaanaskoka,
Rabbi ib sababka baarakenni.
28 Wa ijaarka sime igil habakka tu.”
29 Ka Yaqghub balsa ittu,
“Inta reéka akil ayi ib maqadtdtam shagekoka wa kafo tawaabka it ideye taánsasa.
30 Wa la xud la qala ikka fashxana wa Rabbi ib shighilye baarakekka.
Wa aze mi xiin ser qaalachche ide?”
31 Ka Laabaan belayu,
“Mi habakka?”
Wa Yaqghub balsa ittu,
“Xabbat iitahabanni.
Wa laakiin,
xatte waraat wide iyye wa ana qadtaalka wa qabaageqka qawqil wa qaghghib ikka.
32 Yom ghabatta muraxka ishaagig ikka wa killa la qabaageq la kawakkib wa kil qiyot tsalliim wa la qadtaal la kawakkib qaare wa ijaarye ligbó ikka.
33 Wa itta mastaghbal inta it amaanachche tishhid.
Dolat gaanex kokabayit laíigaát dtaliit aw tsalliim laíigaá qiyot min saadif itta kasabkowu ana serghaayu qatsabbex.”
34 Ka Laabaan belayu,
“Atifaaghna,
kimma ilu tibe ligbá.”
35 Laabaan laata,
it nafsa la amqil la daballiit la qedabitaat aw kawakkib wa la araddi la kokabitaat aw tsiqidiina laban,
wa kil la qaywaat la tsalayim qaara wa wilaadu qatsbadtaya.
36 Wa fingehu wa finge Yaqghub migyaas salas amqil xadga.
Wa Yaqghub qadtaal Laabaan wa qabaagqu la biqidat la qawqil qala.
37 Wa Yaqghub aghshun dtilul min qicey lubna wa loz wa dollab xamlaay nasá wa dima daamigh shanaadxa itta.
38 Wa xaghohu la qaghshun la shinudxit itta samayit attannaakabaya la qabaageq igil tiráya minna samayit in satte waanna xawnata intitrawax.
39 Wa ghadamma qaghshun titqassab qalat.
Sababu qaywaat qedabitaat wa kawakkib waaladat.
40 Wa Yaqghub la naáyish min salif Laabaan faale qala.
Wa dolatta matqasaab min salif Laabaan la tsalayim wa la qedabitaat laágannaxa qala.
Wa ibilla igil nafsu salif wada aruh min salif Laabaan.
41 Wa dolatta qabaageq la wajayib titqassab,
Yaqghub la qaghshun itta samayit laáttanaakib qala wa la qabaageq ghirubba qaghshun titqassab qalat.
42 Wa la qabaageq kalayil min gabbí,
la qaghshun ghadameha karre yaqala ka la kalayil igil Laabaan gabát wa la wajayib igil Yaqghub.
43 Ka Yaqghub agidda tsagba wa qadtaalu wa qabaagqu wa agbiru wa aamutu wa insaahu wa adugu bazxat.