Isxaagh Diib Jaraar
26
Xare la ardat joq shamlaya.
Illi joq biqid imballa joq la it waghit Ibraahiim qala tu.
Ka Isxaagh jahat Jaraar la Abiimaalik malikka Filisdtiiniyiin qala diiba gesa
2 jalla Rabbi abhaza ittu wa belayu,
“Asik Masir iitidnan wa itta ardat la iblakaata amaskib.
3 Diib illi balad kim gaana igil timbar tu minnaata misilka igil igbá tu wa igil idxaraka tu wa killa illa ardat igilka wa igil talakka igil habba tu.
Itta waqajje la igil Ibraahiim abuka atekowu igil isbat tu.
4 Wa talakka kim kawaakib qastar igil abzaxom wa illi arid killu igil imannaxom tu wa ib talakka umamma iddinya ib kamaala titbaarak.
5 Illi jalla Ibraahiim dtayqenni iwaddiyu halleko.
Hitu zaqachche wa awaamirye wa faraajje wa taqaalimye qaghba.”
6 Ka Isxaagh diib Jaraar xadra.
7 Xaariit sabba arid ib issiitu saálawu.
Ka,
“Xichche ta,”
belayom sabab igil iilightolu farha.
Illi jalla laxazziwa maslayu belayu,
jalla Rifgha marra girrim qalat.
8 Xagho wakid,
Abiimaalik malikka Filisdtiiniyiin minna shibbaak min shabba,
Isxaagh Rifgha issiitu in caaghim raáyu.
9 Ka Abiimaalik tlaakayu wa belayu,
“Issiitka ininta,
kafo ‘Xichche ta,’
tibe?”
Wa Isxaagh belayu,
“La sabab la illi ibe ibbu ib sababa igil yiímut tu.”
10 Xare Abiimaalik saála,
“La ila wadekanna mi ta?
Orotta sab ib ghalaal misilla issiitka wasakba wa inta zanib wajalabka itna!”
11 Ka Abiimaalik amir asdara,
“Lagáa ittilli inaas aw issiitu idey lakarre,
imbal saál igil litqaadam tu.”
12 Isxaagh la ardat laha xarsa it nafsa la sanat wa miít qidtif aata sabab Rabbi daxarayu.
13 Wa sanni tajra wa it marhayu twaghghala wa agidda samma.
14 Wa aslaaf min qadtaal wa qabaageq wa xa wa agbir bizxaam qalaw ilu.
Ka la Filisdtiiniyiin xasdawu
15 wa killa la qawalli abuhu Ibraahiim atxafaraya ib xotsa shamshamawa.
16 Wa Abiimaalik igil Isxaagh,
“Gaqaz min ina jalla min ina tarradka,”
belayu.
17 Ka Isxaagh min ken naksa wa diib Xiliil Jaraar kara wa diibu xadra.
18 Ka Isxaagh la qawalli la it waghit abuhu txafarat wa la Filisdtiiniyiin xagho mot Ibraahiim sheshawa atxanfala.
Wa ib killa la asmaay la abuhu saamayaata saamaya.
19 La shaghghaala diibba maxaaz inde laxafraw,
qela ghizir rakbaw.
20 Ka mawqilat Jaraar mawqilat Isxaagh twaananaw wa,
“La maay naayna tu!”
belaw.
Wa la qela Sigh sammet jalla tnaazaqawu itta.
21 Xare qela biqidat xafraw wa hita ma tnaazqaw itta.
Ka Isxaagh Sixitat samaya.
22 Xaghohu min ken gaqaza wa qela biqidat xafra wa iitbasaw itta.
Ka Raxubut samaya wa bela,
“Rabbi arxaba inna wa itta midir igil nifre tu.”
23 Wa xare,
min laha asik Biír Sabaq twaghghala.
24 Wa itta laali laha,
Rabbi abhaza ittu wa belayu,
“Ana Molaay Ibraahiim abuka ana.
Iitifajjeq sabab gorka halleko wa ibaarkakka wa talakka iwassik min ajil gabirye Ibraahiim.”
25 Ka ittaahu wacam waccama wa ib simet Rabbi daqa wa kematu waatada.
Wa ken agbir Isxaagh qela xafraw.
26 Wa min Jaraar Abiimaalik wa Axuzaat naasxaayu wa Fiikul ghaayid deshu gaanxawu.
27 Ka Isxaagh saálayom,
“Mi amtseékum asikye?
Intim laábekuni wa min baladkum daagankuni?”
28 Ka belawu,
“Rabbi iyudka reénhu ka belna,
‘Fingena itifaaghiyat igil tahalle xazena,
wa misilka misaagh igil nide.’
29 Jalla illi,
aza iitide itna,
kimsalla ib sannet tghaarxanaaka wa ib salaam saarxanaaka wa aze inta Rabbi daxarekka.”
30 Ka Isxaagh xiraab wada ilom ka balqaw wa sataw.
31 Wa fajrata igil xid maxalaw wa Isxaagh ib salaam saarxayom.
32 Wa asaru itta amqil laha nosa,
agbir Isxaagh matsáw wa ibba qela laxafrawa assaálawu.
Wa,
“Maay rakabna!”
belawu.
33 Ka hita Shibqa belaya sababu la madinat asik illa Biír Sabaqa tissamme.