Matwallaad Isxaagh
21
Wa Rabbi it Saara anqama kimma belaya wa qidmu atmama ila.
2 Ka Saara qamsat wa igil Ibraahiim wal waldat it qibinaahu wa illi itta waghit la Rabbi belayu tamma.
3 Ka Ibraahiim la waldu la Saara waldattu ilu,
Isxaagh samayu.
4 Wa Ibraahiim diibba amqil la saamnayit akshabayu kimma Rabbi ammarayuta.
5 Wa Ibraahiim wad 100 sanat qala waan Isxaagh waldu twallada.
6 Wa Saara telat,
“Molaay assaxaghenni wa illa lasamqaaka lissaxagh misilye.”
7 Wa telat,
“Min igil Ibraahiim,
‘Saara ajanniit igil taqadtbe tu,’
wabela?
Wa illa ana it diglilnaahu wal waladko igilu.”
Digna Haajar wa Ismaaqiil
8 Wa la wal ambatbata wa qatsbarawu wa itta amqil laha Ibraahiim walimat riít wada.
9 Wa Saara wad Haajar la Masriyat la igil Ibraahiim la waldattu it Isxaagh walda litarjag reéttu.
10 Ka igil Ibraahiim telattu,
“Illa amat wa la walda daagannom sabab wad illa amat misil Isxaagh walye iiwarris.”
11 Ka Ibraahiim min illa higya libbu saghghala jalla Ismaaqiil waldu.
12 Ka Rabbi belayu,
“Jallaabba xitsaan wa la amatka,
iitishaaghal.
Saara latelakkaatu wide sabab ib gabey Isxaagh ziryatka tgabbí.
13 Wadda amat ma,
ummat igil idayu tu jallaab willaadka gaá.”
14 Ka Ibraahiim agwaxa wa nabra wa xarib milú nasá wa it foghaay Haajar karayom wa misil walda saarxaya.
Ka herarat wa diib dangarat Biír Sabaq amholalat.
15 Wa maayya xarib kimsal twaxa,
la xitsaan xan kitkittotat azmat minnu.
16 Wa milkaaf inde aremat miqiddaayu,
kaf wadet ib banna sabab misil raxa tibe,
“La xitsaan inmayit,
qin igil ikre ittu yiíkhil.”
Wa ib bikaay thadtdtaghat.
17 Wa Rabbi qingarra xitsaan samqa wa malaak Rabbi min sama Haajar adha wa belaya,
“Haajar yahey,
haalki tu?
Iitifajjiqi jalla Rabbi qingarra xitsaan samqa ittaahu.
18 Hayaaki la xitsaan sinedu wa atxaadtiru.
Hitu laata,
ummat simiit igil ide minnu tu.”
19 Xare Rabbi boca abraha ka qela reét.
Ka gesat wa la xarib malát wa la xitsaan astet.
20 Wa Rabbi semdaayya mandalaay qala in shangil wa diib dangarat sakna wa modtqot ghos lamda.
21 Wa diib Baadobat Faaraan xadra wa immu issiit Masriyat athadettu.
Misaagh Salaam
22 Abiimaalik wa Fiikul ghayidda deshu igil Ibraahiim belawu,
“Kaalghaay goka halla it killu waraataatka.
23 Ka ib Kaalghaay xaalif iyye ittilla kim iyye wa wilaajje wa talakye iidtallim.
Wa misilye wa misilla ardatta ghishinatka maqruf de kimma ana maqruf wadeko ikka.”
24 Ka Ibraahiim,
“Marxaba,”
belayu.
25 Wa Ibraahiim Abiimaalik atqagaba sabab agbiru qela Ibraahiim zamtaw.
26 Ka Abiimaalik belayu,
“Illi min kim wadayu yaáamarko wa inta yaxabbarkanni wa aze isammeq halleko.”
27 Ka Ibraahiim igil Abiimaalik xa wa qabaageq habayu wa itifaaghiyat wadaw.
28 Xaariit Ibraahiim saboq shineb qadga.
29 Ka Abiimaalik Ibraahiim saála,
“Maqanatta saboq shineb laqadakahan mi ta?”
30 Ka balsa,
“Inta la saboq shineb titkabat minye kimsal shahaadat igilye illa qela ana kim xanfalkowa.”
31 Sabat illi la akaan laha Biír Sabaq titbahal jalla kilíitom ken maxalaw.