Haajar wa Ismaaqiil
16
1-3 Xagho Abraam 10 sanat diib balad Kanqaan kalá ma,
Saaraay issiitu willaad iiwaldat.
Wa amat masriyat Haajar tissamme qalat ila.
Ka tellu,
“Rabbi kiínna willaad kalénni.
Ka itta amachche ite,
wal min irakkib minna.”
Ka Abraam waafagha.
Wa Saaraay la amata la masriyat nasát wa habattuta issiit igil tigbá ilu.
4 Wa ata itta ka qamsat.
Wa Haajar qimisnaaha kim raét,
mambayita ghabbat.
5 Wa Saaraay igil Abraam telattu,
“Xaghye it raáska tu!
Ib ideye amachche atxaghafkoka wa qimisnaaha waan aamarat,
xatte iitreékowa.
Rabbi fingeye wa fingeka lifrad!”
6 Ka Abraam igil Saaraay belaya,
“La amat illa ta,
it ideki kim shannahaki daya.”
Wa Saaraay zallatta ka gatstsa qarxet.
7 Wa malaak Rabbi rakbaya diibba qinna kadan la it gabey Shur.
8 Wa belaya,
“Wo Haajar,
la amat Saaraay,
min aya wa asik aya?”
Ka belattu,
“Ana min mambayichche Saaraay ifarrir halleko.”
9 Ka malaak Rabbi belaya,
“Asik molaayitki qaghbili wa it idha kirey.”
10 Wa malaak Rabbi belaya,
“Talakki agidda igil abazzaxom tu wa min bizxinaahom laíilitqallabo gabbó.”
11 Wa malaak Rabbi belaya,
“Illa inti qamsaat
wa wal igil tiladi tu
wa Ismaaqiil sammiyu
jalla Rabbi la dtirqaanki samqa.
12 Wa Ismaaqiil qof igil ligbá tu,
sayfu it killu laámashshish
wa killu sayfu laámashshish ittu,
wa misilla gaá
it akay gasaab nabbir.”
13 Ka Haajar la Rabbi lathaagaya,
“Inta Rabbi reéyaay inta” jallaab “reéyaayye reéko,”
tibe.
14 Sabbat illi,
la qela “Biír Xiyaay Lalirénni” sammet wa hita finge Ghaadish wa Baarid titrakkab.