Likya Abraam
12
Rabbi igil Abraam belayu,
“Min baladka wa qadka wa daar abuka gaqaz asikka ardat la ila aréka.
2 Ka ummat simiit iwaddeka,
wa ibaarkakka,
wa simetka iwaghghil,
wa barkat gabbí.
3 Wa madxiratka,
idxirrom,
wa laragmuka,
iraggimom,
wa ibbika la shuqubba arid killa ibaarik.”
4 Ka Abraam herara kimma Rabbi ammarayu ta wa Ludt taalayu.
Wa min Xaaraan waan gaqaza,
Abraam qimru 75 sanat qala.
5 Mislu Saaraay issiitu wa Ludt wad xuhu wa killu la it Xaaraan akkabawu min maal wa nifus lamalkawu nasá wa asik ardat Kanqaan saafaraw.
Wa kim batsxawa
6 Abraam safar astabda asikka akaan la balludtat Mura titrakkab itta it Shakiim wa ken kara.
Diiba waghit lahey,
la Kanqaaniyiin itta balad lahey qalaw.
7 Wa Rabbi igil Abraam xawatsa wa belayu,
“Illa ardat igil talakka igil imannaxa tu.”
Ka Abraam wacam waccama iglu jalla abhaza ilu.
8 Min ken asik xaslat jahat mifgaar tsaxaay diib Betíil naksa wa kematu waatada finge Betíil diib mudaagh tsaxaay wa Qaay diib mifgaar tsaxaay wa ittaahu wacam waccama igil Rabbi wa ittu xaza.
9 Wa xare,
mageysu attalala shankat Naghab.
Abraam Diib Masir
10 Itta waan lahey,
itta ardat safra tkarret.
Ka Abraam asik Masir darra igil laámxaglil itta jallaab la safra kelim qalat.
11 Wa Masir waan shaága,
igil Saaraay issiitu belaya,
“Mi maslaki,
ana inti issiit girrim kim inti ammir
12 ka la Masriyiin waan lirúki,
‘Illa issiitu ta,’
liblo wa ghatluni wa ikki laátarfo.
13 Sababu,
‘Xittu ana,’
bali,
sanni igil litghaarxuni ib jallaaki wa rixye igil irkab.”
14 Ka Abraam Masir dol batsxa,
la Masriyiin Saaraay aayo girrim raáwa.
15 Wa galela xashim Firqon raáwa wa igil Firqon madxawa ka asik ghasru tnassaát.
16 Ka ib sababa Abraam xarraba wa qabaageq wa xa wa adug wa ganayib wa insa wa agbir wa aamut haybayu.
17 Laakiin,
Rabbi it Firqon wa dtewaahu ghaba saareq qabragha ib sabab Saaraay issiit Abraam.
18 Ka Firqon Abraam atlaaka wa belayu,
“Igil mi kiínna wadekanni?
Wa igil mi,
‘Issichche ta,’
iitelkanni?
19 Igil mi,
‘Xichche ta,’
tibe asik nasákuwa issichche igil idaya?
Aze,
illa la issiitka ta.
Nisá wa taxaagalanni.”
20 Ka Firqon sheghyatu ammara Abraam wa issiitu igil lidtrado misilla butu.