Kûmenya irundu bia ûrongo
4
1 Eendwa, bûtigeetîgagie irundu bionthe bira birî na antû. Ambagaani bûkabigeria bûkoona kana i bia Ngai, n'ûntû iroria biingî bia ûrongo ibiumîrîte nthîgûrû. 2 Ûûgû i bu tûûmba kûmenya muntû arî na Kîrundu wa Ngai. Ûra augaga Yiesû Kîrîstû aayire arî muntû, Kîrundu ûyu n'wa Ngai. 3 Îndî kîrundu kîonthe kîra kiugaga Yiesû ataaya arî muntû, kîrundu gîku gîtiumîîte kîrî Ngai. Kiumîîte kîrî mûregi Kîrîstû ûra bwiyî akaaya, na îîndî ûûgû arî gûkû nthîgûrû.4 Îndî biû, aana, bûrî ba Ngai, na ibûbacindîîte n'ûntû Ngai ûra bûrî n'we n'ûmûnene kîrî ûra arî nthîgûrû. 5 Iroria bibi bia ûrongo biaragia mantû ma nthîgûrû n'ûntû i bia nthîgûrû, na i ntûma antû ba nthîgûrû babithikagîîria. 6 Îndî tiû tûrî ba Ngai. Bara bamwiyî ibatûthikagîîria. Bara batamwiyî batitûthikagîîria. Ûgu i bu tûûmba kûmenya Kîrundu wa mma na kîrundu kîa ûrongo.
7 Eendwa, twendanageeni n'ûntû wendo buumaga kîrî Ngai. Ûra eendanaga i mwana wa Ngai na naiyî Ngai. 8 Ûra ateendanaga atiiyî Ngai, n'ûntû Ngai i wendo. 9 Ngai naatwoniirie wendo bwake na njîra ya gûtûma Mwana wake wa kîmoomwe nthîgûrû, kaingo twona mwoyo n'ûntû bwake. 10 Na wendo bûbû bûkari ûûgû. Ti tiû tweendire Ngai, îndî i Ngai aatwendire aatûma Mwana wake atuîka kîgongwana gîa gûtûma tûrekagîrwa meeyia meetû.
11 Eendwa, wegua i bu Ngai aatwendire ûgu na tiû itûbatîîrue twendanaga. 12 Gûtirî muntû oona Ngai. Îndî ûkeegua tûkeendanaga twingwa, Ngai nakaraga ndeeni yetû na wendo bwake ibûtûûyûraga.
13 Tûmenyaga tûrî ndeeni ya Ngai na Ngai arî ndeeni yetû n'ûntû natwete Kîrundu wake. 14 Itwoneete na itûkûûyagîîra atî Baaba naatûmire Mwana wake atuîka Mwonokia wa nthîgûrû. 15 Ûra augaga Yiesû i Mwana wa Ngai, Ngai nakaraga ndeeni yake na n'we nakaraga ndeeni ya Ngai. 16 Na tiû twingwa itûmenyeete na itwîtîgîîtie wendo bûra Ngai atwendeete nabu.
Ngai i wendo. Ûra akaraga wendooni akaraga ndeeni ya Ngai na Ngai nakaraga ndeeni yake. 17 Wendo bûûyûragua ndeeni yetû kaingo tûûmba kûrûngama tûtarî na ûguaya mûthenya wa kûgiitîrwa îgamba n'ûntû ûtûûro bwetû gûkû nthîgûrû bûkari ta bwa Kîrîstû. 18 Wendo bûtirî ûguaya. Wendo bwa mma ibûrûngagia ûguaya. Kwoogu muntû ûra arî na ûguaya, wendo bwake ti bwa mma n'ûntû ûguaya i bwa îkaanûkia.