3
1 Baaba oonanagia natwendeete mûno na gûtwîta aana baake, na wabu tûrî bo. I kîo n'ûntû antû ba nthîgûrû batatwiyî n'ûntû kinya Ngai batimwiyî. 2 Eendwa, îîndî tûrî aana ba Ngai na mwanka agu tûtiiyî tûgaakara ata. Îndî itûkûmenya rîra akaaya tûkaabuanaana n'we na tûkamwona bûra akari bu bungwa. 3 Na muntû wonthe ûra arî na wîrîgîîro bûbû neetheragia n'ûntû we n'ûmûtheru.4 Ûra eeyagia i watho eegagua akiuna n'ûntû wîyia i kuuna watho. 5 I bwiyî Yiesû aayire kaingo tûrekerwa meeyia meetû na we wengwa atirî wîyia. 6 Ûra wonthe akaraga ndeeni ya Kîrîstû atikaraga akîîyagia. Îndî ûra akaraga akîîyagia atimwiyî buru.
7 Aana baakwa, muntû atikaabwenie. Ûra arûthaga bûra kûbatîîrue n'ûmwagîru ta bûra Kîrîstû arî ûmwagîru. 8 Muntû ûra akaraga akîîyagia ûyu n'wa Nkoma, n'ûntû Nkoma eeyiirie kuuma kîambîrîria. Mwana wa Ngai aayire kaingo eenyangia ngûgî cia Nkoma. 9 Ûra acierwe i Ngai atikaraga akîîyagia n'ûntû mûkarîre wa Ngai ûrî ndeeni yake. Na n'ûntû Ngai n'we Îthe, ûra acierwe i Ngai atiûmba gûkara akîîyagia. 10 Bûbu i bu tûûmba kûmenya nabu aana ba Ngai na ba Nkoma. Muntû ûra atarûthaga bûra kûbatîîrue, ûra ateendaga eetîgîri bara bangî, ûyu t'wa Ngai.
Endanagaani
11 Ûrutani bûra bweegiirue i bûbû; nwa mwanka twendanage. 12 Tûtigaakare ta Kaini ûra wa Nkoma, ûra aûragire mûruagina. I mbi yatûmire amûûraga? N'ûntû Kaini aarûthaga ûthûûku, îndî mûruagina aarûthaga bûra kûbatîîrue. 13 Bûtikaarigare bwamenwa n'antû ba nthîgûrû. 14 Itûkûmenya bwega ituumîîte gîkuûni twathûngîra mwoyooni n'ûntû itwendeete eetîgîri bara bangî. Ûra ateendeete eetîgîri bara bangî atauma gîkuûni. 15 Muntû ûra athwîre mwîtîgîri ûra ûngî i mûûragani. Na i bûkûmenya bwega gûtirî mûûragani arî na mwoyo wa tene na tene ndeeni yake.
16 Kwîruta kwa Yiesû na gûkua n'ûntû bwetû i ku gûtwonagia bûra wendo bûkari. Wana tiû itûbatîîrue gûkua n'ûntû bwa eetîgîri bara bangî. 17 Muntû akaaya kwîgua arî na into biingî bia kûmûgana na akoona mwîtîgîri ûra ûngî atarî gîntû na akarega kûmûteethia, n'ata muntû ta ûyu aûmba kuuga arî na wendo bwa Ngai ndeeni yake? 18 Aana baakwa, twonanagieni wendo bwetû i bwa mma na mantû mara tûkaarûthaga, îndî ti na kwaria gunka.
19 Wendo bwetû kîrî eetîgîri bara bangî i bu bûgaatûma tûmenya tûrî na ûmma, na atî, twaûmba kûrûngama mbere ya Ngai tûtarî na ûguaya nkorooni cietû. 20 Ûkeegua nkoro cietû igîtûgambithagia, Ngai n'we mûnene kîrî cio na naiyî mantû monthe.
21 Eendwa, îndî ûkeegua nkoro cietû itagûtûgambithia, tûkeegua tûrî na kûûmîîria mbere ya Ngai. 22 Bionthe bira tûrombaga itweyagwa bio n'ûntû itwathîkagîra maathana maake na itûrûthaga mantû mara mamûkenagia. 23 Na yathana rîake rîra atwete, n'atî twîtîgîre Mwana wake, Yiesû Kîrîstû na twendanage ta bûra atwathîîte. 24 Ûra aathîkagîra maathana maake akaraga ndeeni ya Ngai, na Ngai n'we arî ndeeni yake. Na Kîrundu ûra aatwere n'we atûmaga tûmenya Ngai arî ndeeni yetû.