Gwîtîgia Mwana wa Ngai
5
1 Ûra eetîgîîtie Yiesû n'we Kîrîstû, ûyu i mwana wa Ngai. Na ûra eendeete îthe neendeete kinya mwana. 2 Tûmenyaga itwendeete aana ba Ngai n'ûntû itwendeete Ngai na itwathîkagîra maathana maake. 3 Rîra twathîkagîra maathana ma Ngai i rîo twonanagia itûmwendeete na maathana maake ti maûmo. 4 Ûra aciarîîtwe i Ngai nacindîîte nthîgûrû na tûcindaga nthîgûrû na njîra ya wîtîgio bwetû. 5 Na n'ûû we aûmba gûcinda nthîgûrû, twanga ûra eetîgîîtie Yiesû i Mwana wa Ngai?6 Yiesû Kîrîstû noonaniirue i Mwana wa Ngai na njîra ya rûûyî na nthakame ya gîkuû gîake. Ataaya na rûûyî runka. Aayire na rûûyî na nthakame. Kîrundu nakûûyagîîra ntheto ino i cia mma n'ûntû Kîrundu aaragia ûmma. 7 Akûûyî i bathatû. Nabo i 8 Kîrundu, rûûyî na nthakame. Na bonthe barî bathatû i bagwatanagîra. 9 I twîtîgagia ûkûûyî bûra antû beeyanaga. Îndî ûkûûyî bwa Ngai bûra eeyanaga bwa Mwana wake i bu bûnene. 10 Ûra eetîgîîtie Mwana wa Ngai arî na ûkûûyî nkorooni. Îndî ûra ateetîgîîtie Ngai namûtuîkithagia mûûrongo n'ûntû atiîtîgagia ûkûûyî bwa Ngai bûra augaga îgûrû rîa Mwana wake. 11 Ûkûûyî bwa Ngai buugaga, Ngai atwete mwoyo wa tene na tene na mwoyo ûyu ûrî ndeeni ya Mwana wake. 12 Ûra arî na Mwana wa Ngai arî na mwoyo. Îndî ûra atarî n'we atirî na mwoyo.
Mantû ma mûthia
13 Mbwandîkîrîte baarûa îno kaingo bûmenya bûrî na mwoyo wa tene na tene, n'ûntû i bwîtîgîîtie Mwana wa Ngai. 14 Tûtirî na ûguaya mbere ya Ngai tûkîmûromba n'ûntû itwiyî natwîgagua. Na tûkaaya kûmûromba gîntû kûringana na bûra eendaga, natweyaga kîo. 15 Itwiyî n'ûmma neegagua rîra tûkûmûromba. Kwoogu kinya bira tûmûrombaga itwiyî natweyaga.
16 Muntû akaaya kwona mwîtîgîri ûra ûngî akîrûtha wîyia bûtaûmba kûreeta gîkuû, namûrombere Ngai ûra akamwaa mwoyo. Kûrî wîyia bûûmba kûreeta gîkuû. Ntikuuga bûrombe n'ûntû bwa wîyia ta bûbû. 17 Mabîtia monthe i meeyia, îndî ti meeyia monthe mareetaga gîkuû.
18 Itwiyî ûra aciarîîtwe i Ngai atikaraga meeyiani n'ûntû Mwana wa Ngai namûrigagîîria atikaathûkue i Nkoma. 19 Itwiyî tûrî ba Ngai na itwiyî antû bonthe ba nthîgûrû baathagwa i Nkoma. 20 Itwiyî Mwana wa Ngai naayire na atwa ûmenyo, kaingo tûûmba kûmenya Ngai wa mma. Tûkaraga ndeeni ya Ngai wa mma na ndeeni ya Mwana wake Yiesû Kîrîstû. Ûyu n'we Ngai wa mma na n'we mweyani wa mwoyo wa tene na tene.
21 Aana baakwa, îmenyeereeni kuuma kîrî ngai cia mîbuanaano.