2 TIMOTHEO
Nkeethi
1
1 I niû Paûrû, mûtûmwa wa Kîrîstû Yiesû ngûkwandîkîra. Ndathuurirwe i Ngai kaingo ntûmîîria kîrî antû mantû ma mwoyo ûra Ngai atwîrîîte agatwa, ûra wonekaga ndeeni ya Kîrîstû Yiesû. 2 Ndîkwandîkîra, woû Timotheo, mwana wakwa ndeeni ya wîtîgio, ûra mbendeete.Ngai Baaba na Kîrîstû Yiesû barookwaa ûtugi, kîao na ûkiri.
Paûrû agîcookia nkaatho na agîîkîra Timotheo wîru
3 I ngûcookia nkaatho kîrî Ngai ûra ndutagîra ngûgî ta bûra bakîûyûûyû baamûrutagîra, ntakwîgua nkoro yakwa îkîngambithia. Magiita monthe inkûririkanaga marombaani maakwa ma ûtugû na mûthenya na incookagîria Ngai nkaatho n'ûntû bwaku. 4 I ndirikanaga meethori mara weetûûrire. Na i kîo gîtûmaga mbîrîgîîra mûno gûkwona kaîrî, mbûyûrwa i gîkeno.
5 Naka ntiriganagîrua i wîtîgio bwaku bwa mma. Wîtîgio bwaku i ta bûra ûyûûgu Rois na nyûkwe Iunis baarî nabu. Ndî na mma kinya woû ûrî na wîtîgio tabo. 6 Kwoogu ndîenda gûkûririkania nkwîra cooka gûtûmîra kîewa kîra Ngai aakwere kagiita kara ndakwaigîîre njara. 7 Kîrundu ûra Ngai aatwere ti kîrundu wa gûtwîkîra ûguaya. I kîrundu wa gûtwaa inya, wendo, na inya ya kûgiria mwîrî ûkwatha. 8 Kwoogu ûtikeegue îgi ûkîruta ûkûûyî bwaku îgûrû rîa Mwathani wetû, kana i bûra ndî nceera n'ûntû bwake. Ûmîîria ûngwatie kûthîîna n'ûntû bwa ntheto îmbega, Ngai agakwa inya ya gûgwotithia.
9 I Ngai aatwonokiirie atwîta tûtuîka antû baake baatheru, na t'ûntû bwa ngûgî imbega ira tûrutîîte. Îndî n'ûntû bwa mûbango wake we wengwa kûringana na ûtugi bwake. Na aatwere ûtugi ndeeni ya Kîrîstû Yiesû kuuma wo tene mûno. 10 Îîndî n'atwete ûtugi na njîra ya gûtûtûmîra Mwonokia wetû Kîrîstû Yiesû, ûra aayire aathiria gîkuû inya, oonania na ntheto îmbega njîra ya kûthi mwoyooni wa tene na tene.
11 Ngai aanthuurire ntuîka mûtûmîîria, mûtûmwa na mwarimû wa ntheto îmbega. 12 Na i kîo gîgûtûma nnyamaarua ûûgû. Îndî amwe na ûgu ntikwîgua îgi n'ûntû inkûmenya ûra mbîtîgîîtie na imbiyî na mma arî na inya ya kûmenyeera bwega kîewa gîa ntûmwa ya ntheto îmbega kîra ampeere mwanka ntugû ya mûthia buru. 13 Ririkanaga moorutani monthe ma mma mara nkûrutanîîte. Matûmagîre marî ngerekano ûrî na wîtîgio na wendo kuuma kîrî Kîrîstû Yiesû. 14 Na kwa inya ya Kîrundu Ûmûtheru ûra atûûraga ndeeni yetû, menyeera kîra wetwe ûkîmenyeera. I kîega.
15 Wa ta bûra wiyî, eetîgîri ba nthîgûrû ya Îcia bonthe, kinya Fîgerasi na Amogenes beene i bantoorookire. 16 I nkûrombera Onesiforas na antû ba mûciî wake bonthe nkauga Mwathani nabeegue kîao n'ûntû magiita maingî n'aambûmagîîria nkoro na atoonaga rîrî îgi kwîgua ndî ûmûthaîke nceera. 17 Akûûya aakinya Rooma ûgu, aanjîîrie gûncûa na inya mûno mwanka rîra angwatithaniirie ara ndaarî. 18 Inkûromba Mwathani amwîgue kîao ntugû ya mûthia. N'aanteethiirie mûno rîra ndaarî Efeso. Na wana woû n'ûkûmenya ûgu bwega.