Kûûragwa kwa Njoana Mûbaatithania
14
1 Kagiitaani gaku Eronde ûra aathanaga rûteere rûru rwa Gariiri akwîgua nkuma ya Yiesû 2 eera aruti ngûgî baake, “Ûyu i Njoana Mûbaatithania arariûkire kûringana na inya înu arî n'yo ya kûringa biama.” 3 Gwatuîkîîte Eronde augîîte Njoana agwatwe athaîkwe nceera, n'ûntû bwa Erondia. Erondia aarî mûka wa mûruagina wa Eronde eetagwa Firibû. 4 Njoana aakaraga akîîraga Eronde ti bwega gûkara na mûka wa mûruagina taka aarî wake, na Firibû arî mwoyo. 5 N'ûntû bwa ûgu, Eronde neendaga kûûraga Njoana, îndî agakuthûka antû n'ûntû naiyî antû i boonaga Njoana aarî kîroria.6 Ntugû ya kîatho gîa gûkeneera gûciarwa kwa Eronde îgûkinya, mwarî wa Erondia ainîra Eronde na ageni baake ndanci bwega, aakenia Eronde. 7 Eronde aathiîtia amwîra, “Mbîîra kîonthe kîra ûkwenda na ngakwa kîo.”
8 Mwarî aathwa i gina amwîra auge arîenda eewa kîongo kîa Njoana Mûbaatithania kîrî thaaniini warîru arî agu. 9 Mûnene akwîgua ûgu aagwatwa i kîeba. Îndî gûtirî bu akîrûtha arega kûmwaa kîo n'ûntû bwa bûra aarî akûthiîtia mbere kinya ya ageni baake. Kwoogu auga mwarî ûyu arûthîrwe woogu augire. 10 Aatûmana nceera Njoana aagiitwa kîongo 11 kîareeterwa mwarî wa Erondia kîrî thaaniini. Mwarî ûyu aathûkia aanenkera gina kîo. 12 Arutwa ba Njoana baathi baathûkia mwîrî wake baathi baathika. Bakûmûthika baathi beera Yiesû.
Yiesû aagaagûra antû ngiri itaano
13 Yiesû akwîgua mantû mamu auma agu na îtarû aathi wenka bantû gûtaarî n'antû. Antû bakûmenya bauma taûni ciao bamûthingata na magûrû. 14 Warîra Yiesû agîkinyûka kuuma îtarûûni oona bûra antû baingîîte bûgana, abeegua kîao mûno. Ooria aayie. 15 Ûgoro bûgûkinya arutwa baake baathi bamwîra, “I gûkwenda gûtuga na i ta rwanda rûrû tûrî. Îra antû bathi kaingo bakinya ntûûra beegûrîra irio.”
16 Yiesû abeera, “Gûtirî gîtûmi gîa kûbeera bathi. Beeni gîntû bûrî biû barîe.”
17 Arutwa baake bamwîra, “Aaga i mîgaate îtaano na makûyû maîrî akî tûrî namo.”
18 Yiesû abeera, “Tareeteeni bio.” 19 Yiesû eera antû bakare nthî nyakiini. Aathûkia mîgaate înu îtaano na makûyû mamu maîrî. Aacûûba îgûrû aacookeria Ngai nkaatho. Rîru ang'enyûranangia mîgaate înu aanenkera arutwa baake bagaîra antû. 20 Antû bonthe bara baarî agu baarîa baabaa. Arutwa beethîrania ikaabû îkûmi na biîrî bia mang'enyûrû ma mîgaate na inuku bia makûyû mara maatigarire. 21 Antû arûme bonka bara baagaagûrirwe baarî ngiri itaano, tûtagûtara aka na twana.
Yiesû athiîrîîte îgûrû rîa rûûyî
22 Nyuma ya ûgu Yiesû eera arutwa baake batwe îtarûûni bathiiyage rûgongo rûra rûngî rwa îria, we aatigwa akîîra kîrîndî kîînûke. 23 Akûrîîkia gûtigana na kîrîndî, Yiesû aatwa karîmaani arî wenka kûromba Ngai. Aaromba mwanka gwatuga. 24 Thaa inu îtarû irîarî rîkûthi kûraaya mûno na irîainainagua i makûmbî ma rûûyî n'ûntû bwa bûra rwarîrigagîîria. 25 Rware rûgîtema Yiesû aaya kîrî arutwa baake athiîrîîte îgûrû rîa rûûyî. 26 Arutwa baake bakûmwona baamaka mûno. Bauga, “I nkoma.” Baaringa gîtuma mûno n'ûguaya.
27 Warîru Yiesû aaria nabo. Abeera, “I niû, ûmîîriani! Tigaani kûmaka.”
28 Petûrû amwîra, “Mwathani, wegua i woû, uga mbûye nthiîrîîte îgûrû rîa rûûyî na niû.”
29 Mwathani amwîra, “Ncû!”
Petûrû auma îtarûûni aakinya rûûyî aanjîîria kûthi kîrî Yiesû. 30 Îndî akwona bûra ruuo rwagana aagwatwa n'ûguaya, aanjîîria kûriama. Auga mbu auga, “Nteethia itû, Mwathani!”
31 Warîru Yiesû aatambûrûkia njara amûgwata. Amûûria, “Ka ûrî na wîtîgio bûniini ata? I kî ûtagwîtîgia?”
32 Bagûtwa îtarûûni ruuo rwatiga kûbuutana bûra rwabuutanaga. 33 Bara baarî îtarûûni baagonga Yiesû bauga, “I mma woû ûrî Mwana wa Ngai.”
Yiesû ooria aayie gûntû gweetagwa Ngenesareeti
34 Yiesû na arutwa baake baaringa îria, baakinya bantû eetagwa Ngenesareeti. 35 Antû ba noogo bakûmwona bamûmenya. Baatûmana ntûûra antû beerwa. Antû baareetera Yiesû aayie baao bonthe bara baayîîtue. 36 Bamwereka bamwîra eetîgîîrie aayie batongithie nwa mûthia wa nguo yake. Yiesû akûbeetîgîîria bara bonthe batongithiirie boora.