Kûûma kîongo na kûthîîna kwa Isiraeri
7
1 Ûi! îî niû!Niû nkari ta matunda mara makethagwa îgiita rîa thaano,
ta ncabiibû ira ibaaragwa nyuma ya maketha;
gûtirî magaro ma ncabiibû ma kûrîa
na gûtirî nkûyû cia mbere ira nkwenda.
2 Antû eetîgua i baciatîîtwe bonthe bauma nthîgûrû;
gûtirî muntû ûmwagîru atigeere nwa ûmwe.
Antû bonthe bategagîîra beeteereete gwîtûûra nthakame;
wa kîra ûmwe aguîmaga mûruagina na mûtego.
3 Njara ciao irî ciîrî irî waara bwa kûrûtha moothûûku;
mûnene arîîtia biewa,
njanji ageetîgîîria ngukumo,
ûra arî na inya arûthaga bûra akwenda
bonthe babîîndaga njûri barî amwe.
4 Muntû ûra mwega mûno waabo akari ta mûng'oora,
ûra aagîrîîte mûno i mûthûûku nkûrûki ya rwinci rwa mîîgua.
Ntugû îra akaria beenu tabo iroria, baabwîrire îgûkinya,
ntugû ya gûkaanûkua i Ngai.
Îîndî i kagiita ga antû babu kûrigicana.
5 Ûtigeetîgie mûtûûri;
ûtigeetîgie mûcoore.
Kinya ûra bûmaamaga amwe n'we
menyeera mîgambo yaku.
6 N'ûntû mwana naregaga gûtîîya îthe,
mwarî agaûkîîra gina,
mûkwamwana agaûkîîra maciarawe.
Anthû ba muntû n'antû ba mûciî wake uungwa.
7 Îndî niû, nkaaraitha ndî na mwîrîgîîro kîrî Mwathani,
Mbeteere Ngai mwonokia wakwa;
Ngai wakwa akaambîgua.
Isiraeri yaagarûkîra Ngai na baarekerwa
8 Ûtigaakeneere thîîna ciakwa, woû mûnthû wakwa!
Wana wegua nkûgwa, nkaarûngama kaîrî;
wana ndaakara mwinduuni,
Mwathani akeegua arî werû bwakwa.
9 N'ûntû i mbîyîîtie kîrî we,
Nkaûmîîria mûthûûro wa Mwathani,
mwanka rîra akantheteera,
na ambonokie.
Akandeeta ome werûûni,
naani nkoona wagîru bwake.
10 Rîru mûnthû wakwa akoona ûntû bûbu
na agîe îgi,
ûra aambûûriirie,
“Arîkû Mwathani, Ngai waku?”
Meetho maakwa makoona kûgwa gwake;
kinya îîndî agaakinyangwa na mbayo
ta ntaga barabaraani.
11 Îkeegua îrî ntugû ya gûcookeeria nthingo ciaku,
ntugû înu mîanka yaku îkaaramua kûûraaya.
12 Ntugû înu antû bakaaya kîrî woû
kuuma Aramu na taûni cia Miisiri,
kinya kuuma Miisiri mwanka Yufîrîti
na kuuma îria kûthi rîra rîngî
na kuuma kîrîma kûthi kîra kîngî.
13 Nthîgûrû îgaatuîka îganjo n'ûntû bwa bara batwîre ku,
n'ûntû bwa ngûgî ciao inthûûku.
Îromba na gûkumia
14 Rîîthia antû baaku na mûthanju waku,
ng'ondu cia rûgai rwaku,
ira itûûraga irî cionka kîthakaani,
gatîgatî ka nthî înoru ya ndîîthia.
Ka irîe ndîîthiani inoru cia Mbasani na Ngiriandi
ta ntugû cia tene.
15 Mwathani ariuga, “Ta ntugûûni ira bwaumire Miisiri,
nkabariingîra biama.”
16 Mîgongo îkoona, na îîgue nthoni,
n'ûntû bwa kwaga inya kwao.
Bagaakunîka tûnyua twao na njara
na matû maao makaûra.
17 Bagaacûna tîîri ta njoka,
ta nyamû ira ciîkururagia nthîgûrû.
Ikaaya ikiinainaga ciumîîte mîrinyaani yacio;
ikaagarûkîra Mwathani Ngai wetû na ûguaya
na ikaamaka i woû.
18 Gûtirî Ngai ûngî ta woû,
ûra arekagîra wîyia na atataraga mabîtia
ma matigari ma rûgai rwake?
Ûtikaraga ûthûûri tene na tene
îndî n'ûkenagîîra kwîganîîrua kîao.
19 Ûgatwîgîîrua kîao kaîrî;
ûgaakinyanga meeyia meetû
na ûgere mabîtia meetû monthe nkona ya îria.
20 Ûkeegua ûrî wa mma kîrî Njakubu,
na ûkeegîîrua Îburaîmu kîao,
wa ta bûra weeranire na mûthiîtio kîrî ba baaba beetû
kuuma ntugû cia tene.