2
1 Îtaanî aruanyûkwe Aisiraeri Amia na aaranyûkwe nabo bûbeete Ruama.bIsiraeri yaakaanûkua na yacookanîîrua
2 Ariani na nyûkwe Isiraeri, ariani n'we,
n'ûntû ti mwekûrû wakwa kaîrî,
na ntirî mûkûrû wake.
Mwîreeni aûndûkîrie ûthûngîîri mûgongo,
na atigane na ûmaraaya.
3 Wegua atiitiga nkaamûcoomora nguo cwe,
atigwe wa bûra aaciarirwe.
Mûtuîkithie ta ng'aarû,
ta gûntû kûûmo ng'a,
na mûûrage na bûûta.
4 Na ntiîgîîrua aana baake kîao
n'ûntû n'aana ba ûthûngîîri.
5 N'ûntû gina n'egîîtue atarî mwîtîgua;
ûra agîîre nda ya twana tûtu,
atirî nwa nthoni.
Augire, “Nwa ntumire ûcoore na arûme baangî
bara baampeyaga bia kûrîa na rûûyî,
guaya na kûcemethû cia kûrûtha ngoora ya gûtuma nguo
na maguta na ndibei.”
6 Kwoogu nkainga njîra ciake na mainci marî mîîgua;
na mmwingîîrie na rûthiingo
kaingo aaga bantû a kûgendeera.
7 Akaageria kûthingata acoore baake ba arûme,
îndî atibakinyîîra,
abacerie,
na atiboona.
Rîru i rîo akaathûgaania auge,
“Ndîthi ncooke kîrî mûkûrû wakwa,
n'ûntû rîra ndaarî wake i ndaarî kaaba nkûrûki ya îîndî ûûgû.”
8 Atiiyî kana i niû ndamwere bira bionthe arî nabio
irio, ndibei, maguta,
i niû ndamwere kinya fetha na thaabu bira aatûmagîra kûgonga Mbaari nabio.
9 Kwoogu nkamûtuunya
irio biakwa na ncabiibû ciakwa îgiita rîa maketha,
na mmwerie guaya na kûcemethû ciakwa
ira mweyaga cia gûtuma nguo cia gwîkîra.
10 Nkamûcoomora nguo anyaanya baake bakîonaga
na gûtirî we akamûteethia
kana amûtuunyûkia kuumania na inya yakwa.
11 Naani nkaathiria gîkeno gîake,
gûtirî biatho bia Sabatû, bia kûyiûka kwa mweri,
kana bia kîî mwanka.
12 Nkeenyangia mîcabiibû na mîkûyû yake
îra augaga n'yo anyaanya baake bamûrîaga n'yo.
Ngaatuîkithia mîcabiibû na mîkûyû yake kîthaka
gîa kûrîîyagwa i nyamû.
13 “Nkamûkaanûkia n'ûntû bwa magiita monthe
mara aathiiyaga kûbîîthîria Mbaari macoco.
Eegemagia na mîkathî na mbete,
rîru akathi kûbîîthîria Mbaari macoco akariganîrua i niû.” I bu Mwathani akuuga.
14 Kaîrî Mwathani auga, “Naani nkaarûtha ûgu, mmûkeethie,
mwire rwandac mmwarîîrie mpoora, na wendo tûrî noogo.
15 Wa tûrî noogo nkamûcookeria mînda yake ya mîcabiibû,
na ngarûre kîbonde gîa Akorid gîtuîke mwîrîga wa wîrîgîîro.
Na akaambîtîgîîria wa ta bûra ambîtîgagîîria rîra aarî mwarî,
rîra aumîîte Miisiri.
16 Na kuuma ntugû înu, akaambîtaga mûkûrû wake
na atiigweta riîtwa Mbaari kaîrî.
17 Ntimûreka agweta mariîtwa ma ngai ciingî,
atikooro amagweta kaîrî.
18 Ntugû înu nkabûrûthîra kîrîîkanîro
na nyamû cia kîthaka na nyoni
na tûnyamû tûra tûîkururagia.
Na kinya gûtiîgua kûrî na ndûa ya mpiû kana ya nta,
kaingo antû baakwa bakaraga na ûkiri.
19 Ngakûthûkia ûtuîke mwekûrû wakwa wa tene na tene.
Mbîgue ndî mûkûrû waku wa mma na mwîtîgua,
na nkwendage magiita monthe na nkwîgagîîrue kîao.
20 Nkeegua ndî mwîtîgua kîrî woû ûrî mwekûrû wakwa,
naawe ûkaamenya i niû Mwathani.
21 Ntugû înu nkeegua,
na nkaurithia mbura nthîgûrû.
22 Nthîgûrû n'yo îîgue îrî na maketha ma irio,
ncabiibû na nceituuni,
nabo bagaacookia bauge, Njesireeri.
23 Naani nkaanda antû baakwa ba Isiraeri nthîgûrû înu.
Nkeegîîrua kîao antû bara ndaugire, ‘Ntibeegîîrua kîao,’e
nabo bara ndeerire, ‘T'antû baakwa,’f
mbeere, ‘Biû bûrî antû baakwa,’
nabo bauge, ‘Ûrî Ngai wetû.’ ”