Ncûûni tûkumie Mwathani
148
1 Kumiani Mwathani!Mûkumieni arî naagu îgûrû,
mûkumieni bûrî bantû ara aûkîîru!
2 Mûkumieni bwinthe araîka baake,
mûkumieni bwinthe njûûrî ciake!
3 Mûkumieni biû riûa na mweri,
mûkumieni biû nthata ira ithararaga!
4 Mûkumie woû ûrî îgûrû rîa îgûrû,
na biû rûûyî rûra rûrî îgûrû!
5 Bionthe i bikumie riîtwa ria Mwathani!
N'ûntû aathanire, nabio biaûmbwa.
6 Abirikia tene na tene,
na abiîkîîra mîanka îtagîkûrûkîka rî kana rî.
7 Kumagiani Mwathani bûrî nthîgûrû,
biû nyamû cia îria na mborokero cionthe cia îria.
8 Mwanki na mbura ya maiga,
mbaraabu na ngooki,
na kinya ruuo rûûnene rûra rûrûthaga kwenda gwake.
9 Irîma na tûrîma,
mîtî ya matunda na mîthithinda.
10 Nyamû cia kîthaka na ng'ombe,
tûnyamû tûra tûniini na nyoni îra ibuurûkaga.
11 Anene ba nthîgûrû na antû bonthe,
agiiti magamba na aathani bonthe ba nthîgûrû!
12 Nthaka imbîthî na aarî,
akûrû na twana!
13 I bakumie riîtwa rîa Mwathani,
n'ûntû riîtwa rîake rîonka i rîo rînene,
na ûkumio bwake bûrî îgûrû nkûrûki ya nthîgûrû na îgûrû.
14 Naûkîîrîîtie antû baake mûnene ûrî na inya,
bûrî ûkumio kîrî atheru baake bonthe,
na kîrî antû ba Isiraeri bara barî akubî n'we.
Kumiani Mwathani.