Gûkumia Ngai Mwene Inya
147
1 Kumiani Mwathani!N'ûntû bwega kwinîra Ngai wetû,
n'ûntû i bwega kûmûkumia, na i bu kûbatîîrue.
2 Mwathani n'we wakîîte Njerusaremu;
Aisiraeri bara baakûûrirwe mîciî yao akabeethîrania.
3 N'we wooragia bara baakuîte nkoro,
na akabooga ironda biao.
4 Ataraga nthata bûra igana,
na cionthe agaituîra mariîtwa.
5 Mwathani wetû n'ûmûnene, na arî inya mûno.
Ûmenyo bwake bûtirî kîthimi.
6 Mwathani n'we ûûkagîîria bara beenyiagia,
bara bathûûku akabaturania nthî.
7 Inîraani Mwathani bûkîmûcookagîria nkaatho,
inîraani Ngai wetû na wandîndî.
8 N'we ûkunîkagîra îgûrû na matu,
n'we uurithagia mbura nthîgûrû,
na n'we ûtûmaga nyaki îkûra irîmaani.
9 N'we weyaga nyamû cia kîthaka irio biacio,
wana maunga ma nkûngûrû mara maciîkaga.
10 Kûgwîrua gwake gûtirî inyaani ya mbaraathi,
kana gîkeno gîake kîîgua kîrî ncambaani cia ndûa.
11 Mwathani agwîragîrua bara bamûtîîyaga,
bara wîrîgîîro bwao bûrî wendooni bwake bûra bûtathiraga.
12 Kumiani Mwathani, biû Njerusaremu!
Kumiani Ngai wenu, biû Sayuuni!
13 N'ûntû n'we eekîrîte mîrango ya mîîrîga yaku inya,
n'athaarimîîte antû baaku.
14 N'we ûtûmaga kwîgua kûrî na ûkiri mîankaani yaku,
na akûbaithia na ngano îra mbega cwe.
15 Atûmaga maathana maake nthîgûrû,
na kiugo gîake kîthiiyaga na mpwî mûno.
16 Aguîkagîra nthîgûrû na mbaraabu ta mûrîngîti,
na akanyagaaragia ngooki ta muu.
17 Oonoragia mbura yake ya ncûgû ta maiga mara macege,
n'ûû ûûmba kûûmîîria mpîo yake?
18 Eeyanaga watho mbaraabu îgakaanjûka.
Akarekeeria ruuo rwake, rûûyî rûkathi.
19 N'agwûrîte kiugo gîake kîrî Njakubu,
mawatho maake na maathana kîrî Isiraeri.
20 Gûtirî mûgongo ûngî aarûthîra ûgu,
na bataamenya mantû ma maathana maake.
Kumiani Mwathani!