Gûkumia Ngai Mwonokia
146
1 Kumiani Mwathani!Kumia Mwathani, nkoro yakwa!
2 Ngaakumagia Mwathani ntugû ciakwa cionthe rîra ndî mwoyo.
Nkamwinagîra nyîmbo cia kûmûkumia bunka ndî mwoyo.
3 Wîrîgîîro bwenu bûtikeegue bûrî kîrî anene,
kana kîrî muntû, n'ûntû batibûteethia.
4 Baakua, bacookaga mûthetuuni,
ntugû wa înu n'yo mîbango yao îkinyaga mûthia.
5 Kîthaarimo i kîrî muntû ûra Ngai wa Njakubu atuîkîîte ûteethio bwake,
ûra ûteethio bwake bûrî ndeeni ya Mwathani Ngai wake,
6 ûra aûmbire îgûrû na nthî,
îria, na bira bionthe birî ku.
Ûra atûûraga arî mwîtîgua tene na tene.
7 Ûra agambagîra bara bainyîîrîîtue bûra kûbatîîrue,
na ûra weyaga bara barî na yûûra biakûrîa.
Mwathani n'athaûraga bara barî nceera.
8 Mwathani natûmaga ntûngi itua kwona
Mwathani n'aûkagîîria bara batakwîbûmba.
Mwathani n'endeete bara baagîru.
9 Mwathani n'amenyagîîra ageni
nagwatagîîra ntigwa na twana tûkîa,
îndî n'enyangagia mîbango ya bara bathûûku.
10 Mwathani Ngai wa Sayuuni akaathana tene na tene,
Kumiani Mwathani.