Rwîmbo rwa gûkumia
Rwîmbo rwa gûkumia rwa Ndaundi.
145
1 Ngagûûkîîria Ngai wakwa na mûnene,nkaathaarima riîtwa rîaku tene na tene.
2 Ngakûthaarimaga wa kîra ntugû,
na nkumagie riîtwa rîaku tene na tene.
3 Mwathani n'ûmûnene, na nwa gûkumagua mûno,
na ûnene bwake bûtimenyeka bûra bûgana.
4 Wa nthuke îgakumagîîria ngûgî ciaku kîrî nthuke îra îîngî,
na batûmagîîrie ngûgî ciaku cia inya.
5 Ngatua kûthûgaanagîria mantû maûkumio bwa ûnene bwaku,
wana îgweta rîra ûrî, na ngûgî ciaku cia kûrigarania.
6 Antû bakaaragia mantû ma ngûgî ciaku cia inya na cia kûmakania,
naani ngatûmagîîria mantû ma ûnene bwaku.
7 Na antû bagakûngwîra wega bwaku bwa kûgana na bûgakûrûkîîria,
na baine mantû ma wagîru bwaku.
8 Mwathani n'wa ûtugi na wa kîao kîînene,
Ûtithûûrangaga na mpwî na arî wendo bwaku bûra bûtathiraga.
9 Mwathani n'ûmwega kîrî bonthe,
na arî kîao na bira bionthe aûmbire.
10 Bira bionthe waûmbire bigagûcookeria nkaatho, Mwathani,
na atheru baaku bonthe bagakûgonga.
11 Bakaaragia mantû ma ûkumio bwa ûnene bwaku,
na beerane mantû ma inya îra ûrî,
12 kaingo antû bonthe baûmba kûmenya ngûgî ciaku iinene,
na ûkumio bwa ûnene bwaku.
13 Ûnene bwaku i bwa tene na tene,
na wathani bwaku bûgatûûra kîrî nciarwa cionthe.
14 Mwathani n'ateethagia bara bakuîte nkoro,
na akeeyana inya kîrî bara nkoro ciao itarî n'yo.
15 Antû bonthe i woû baraithîîte îgûrû,
na ûbeeyaga irio biao rîra babatîîrue i bio.
16 Ûkuumbatûraga njara yaku
na ûkathiria mathîîna ma bionthe bira birî mwoyo.
17 Mwathani n'ûmwagîru mantûûni maake monthe,
na n'ûmwega mantûûni mara arûthaga monthe.
18 Mwathani arî aakubî na bara bonthe bamûkayagîra,
kîrî bonthe bara bamûkayagîra na njîra ya mma.
19 N'aganagîîria moobatu ma bara bamûkuthûkaga,
n'eegagua irîro biao na akabateethia.
20 Mwathani n'amenyagîîra bara bonthe bamwendeete,
îndî bara bathûûku bonthe akabeenyangia.
21 Ngaakumagia Mwathani,
na kîûmbe kîonthe i gîkumagie riîtwa rîake rîîtheru mwanka
tene na tene.