Îromba n'ûntû bwa gûkûûrwa nagûkara bwega
Sabuuri ya Ndaundi.
144
1 Arookumua Mwathani, Rwara rwakwa rwa iiga,ûra aandutanaga mantû ma ndûa
na akandutana kûrûa.
2 N'we Rwara rwakwa na wîbitho bwakwa,
n'we kîrîngo gîakwa na mûnkûûri,
kaîrî n'we rong'o yakwa,
ara ndîciithaga. We ûra atûmaga antû ba mîgongo beegua barî ruungu rwakwa.
3 Woû Mwathani rî, muntû arî na gîtûmi kîrîkû
ûkeenogia n'ûntû bwake, kana mwana wa muntû, n'ûntû ûthûgaanagia mantû maake?
4 Muntû akari ta mîruke,
ntugû ciake ikari ta kîrundu gîkûrûkîîte.
5 Mwathani, îndamia îgûrû rîaku ûûye nthîgûrû.
Ringithia irîma bitooge ntoogo.
6 Tûma rweni na ûnyagaarie anthû,
gera mîgwî yaku ûbanyagaarie.
7 Taambûrûkia njara yaku ûrî gûku îgûrû,
ûntuunyûkie na ûûndute
ndûûyîîni irî na inya.
Ûmbonokie kuuma njarani cia ageni,
8 bara baaragia ûrongo na tûnyua twao,
bo baaragia ûrongo, bantû a kwaria ûmma.
9 Ngakwinîra rwîmbo rûûyerû, Itû Ngai.
Ngakwinîra nyîmbo cia gûgûkumia na wandîndî ya ndigi îkûmi.
10 N'ûntû i woû ûpeeyaga anene ûûmbani,
Woû wengwa i woû watunyûkiirie Ndaundi mûruti ngûgî waku.
11 Ûntuunyûkie,
ûûndute njaraani cia ageni.
Tûnyua twao twaragia ûrongo,
baaragia ûrongo bantû akwaria ûmma.
12 Aana beetû ba arûme îgiitani rîao rîa wîthî
barookara ta mîtî îra îkûraga bwega,
na aarî beetû bagaakara ta itugî bia koona
bithongamîîtie nyomba ya mûnene.
13 Makûmbî meetû makaûyûra
maketha ma irio bia mîthemba yonthe.
Ng'ondu cietû Igaaciarana magiri na magiri,
na ngiri makûmi ithakaani bietû.
14 Ng'ombe cietû iroociarana mûno,
itakuuna kana ciûra.
Gûtikooro wîgua kûrî na kîrîro gîa kîeba kûra tûkagendeera.
15 Antû bara bathaarimagwa ûgu rî, batikenaga mûno!
Nabo bara Ngai arî Mwathani wao batikenaga mûno!