Îromba n'ûntû bwa gûcwa ûteethio
Sabuuri ya Ndaundi.
143
1 Îgua îromba rîakwa, Woû Mwathani,thikîîria kwerekana gwakwa wagîruuni bwaku,
na ûncookerie n'ûntû woû ûrî mwîtîgua.
Ncû ûnogokie.
2 Ûtikangambithie niû mûruti ngûgî waku;
n'ûntû gûtirî muntû nwa ûmwe ûrî mwoyo mwagîru meethooni maaku.
3 Mûnthû eenganîîte naani,
aturanîîtie ûtûûro bwakwa nthîgûrû.
N'atûmîîte nkara mwinduuni
ta bara bakuire wo tene.
4 Kwoogu i mbagîîte wîrîgîîro,
nkoro yakwa n'îmakîîte mûno.
5 I nkûririkana ntugû cia karaaya,
nkathûgaania mûno mara ûrûthîîte,
na nkathûgaania ngûgî ira ûrutîîte na njara ciaku.
6 I ngûgûûkîîria njara ciakwa,
nkoro yakwa îrîkwenda ta bûra mûthetu ûmûûmo wendaga mbura.
7 Ncookeria na mpwî, Woû Mwathani,
wîrîgîîro bwakwa bunthe bûkûtherekeria.
Ûtikaambithe ûthiû bwaku,
ntigaakare ta bara bathûngagîrua nthikooni.
8 Ûtûme mbîgue wendo bwaku bûra bûtathiraga rûkîîrî,
n'ûntû nwa woû mbîtîgîîtie.
Mbonia njîra îra mbatîîrue nthiingata,
n'ûntû nkûûya kîrî woû na njîra ya maromba.
9 Ntuunyûkia kîrî anthû baakwa, Itû Mwathani,
n'ûntû Ndîîbithaga kîrî woû.
10 Ndutana ndûthe kwenda gwaku,
n'ûntû ûrî Ngai wakwa.
Kîrundu waku ûra mwega,
n'antongoragîîrie nthîgûrû îmbaranîru.
11 N'ûntû bwa riîtwa rîaku, ndiûkia Mwathani.
Nduta thîînaani n'ûntû bwa wagîru bwaku.
12 Na n'ûntû bwa wendo bwaku bûra bûtathiraga, nthirîria anthû baakwa.
Na ûthirie bonthe bara baanyamaaragia,
n'ûntû niû ndî mûruti ngûgî waku.