Îromba n'ûntû bwa gûcwa ûteethio
Sabuuri ya Ndaundi. Îromba rîra aarombire arî îkurunguuni.
142
1 I nkayagîra Mwathani na kayû gaakwa,I mwerekaga na kayû gaakwa.
2 Mbonoragia mûnung'uno wakwa mbere yake,
nkauga mathîîna maakwa monthe mbere yake.
3 Rîra ndaakua nkoro,
i woû ûmenyaga bûra nkaathi.
Njîraani îra Ngendagîîra
antû bambaigagîra mûtego na witho.
4 Ndathiûrûûkia meetho,
ndiona gûtirî we wa gûnteethia,
gûtirî bantû a kwîbitha,
gûtirî we ûgûtindanîra naani.
5 I ngûkûrîrîra, itû Mwathani,
ndiuga, “I woû wîbitho bwakwa,
i woû bionthe bira nkwenda ûtûûrooni bûbû.
6 Thikîîria kîrîro gîakwa,
n'ûntû ndî ûmûringe nthî mûno.
Ntuunyûkia kîrî anthû baakwa,
n'ûntû barî nainya nkûrûki yakwa.
7 Ntharia mbuume nceera,
kaingo ngûcookeria nkaatho.”
Rîru bara baagîru bancereere,
n'ûntû bwa wega bwaku kîrî niû.