Îromba rîa ûgoro
Sabuuri ya Ndaundi.
141
1 Ingûgwîta woû Mwathani, ncû na mpwî ûnteethie.Îgua kayû gaakwa ngîgwîta.
2 Ka îromba rîakwa rîkare ta mûruke ûmwega wa macoco,
gûûkîîria njara wakwa ngîkûromba, gûkare ta kîgongwana kîa ûgoro.
3 Ûtikandekeerie mbaria biugo biithûûku,
karagia mwîrîga wa mîromo yakwa.
4 Ûtikaareke nkoro yakwa yerekera ûntûûni nwa bûrîkû bûûthûûku,
îrûtha mantû maathûûku
amwe na bara barûthaga ûthûûku.
Na ûtikaareke mbûya kûrîa biakûrîa biao.
5 Ka muntû ûmwagîru aandiinge, i kîao,
ka aangondokere i ta maguta kîongooni gîakwa.
Kîongo gîakwa gîtimarega.
Îndî rîonthe îromba rîakwa rîrî kîînyume na moothûûku mara barûthaga.
6 Rîra bakanenkanîrwa kîrî bara bakabagiitîra îgamba,
rîru i rîo bakaamenya kiugo kîa Mwathani i kîa mma.
7 Wa ta bûra muntû arîmaga na mûraaû agîatûrangaga mûthetu,
ûgu nwabu maîndî ma bara bathûûku makaanyagaarua mûromooni wa nthiko.
8 Meetho maakwa i makwerekereete, Woû Mwathani Ngai,
I woû wîbitho bwakwa, ûtikaareke nkua.
9 Ndigîîria kuumania na mûtego ûra bantegeete nau,
kuuma mîtegooni ya bara barûthaga ûthûûku.
10 Rekeeria bara bathûûku bagwe mîtegooni yao bongwa,
naani nkûrûke mayîîga.