Kûrî Ngai ûmwe akî ûra aaragia ûmma
115
1 Ti tiû, i woû Mwathani, ti tiû tûbatîîrue tûkumua,îndî i riîtwa rîaku rîbatîîrue rîkumua,
n'ûntû bwa wega bwaku bûrî wendo na gwîtîgîka gwaku.
2 I mbi n'ûntû antû ba mîgongo bakaûria, “Ngai wao i kû arî?”
3 Ngai wetû arî îgûrû,
arûthaga bûra akwenda.
4 Mîbuanaano yao n'ya fetha na thaabu,
îrûthîîtwe na njara cia antû.
5 Îrî na tûnyua, îndî îtiaragia,
meetho îrî namo, na îtionga.
6 Îrî na matû, na îtiîgagua,
îrî na nyiûrû na îtiîgagua mûruke ûkînunka.
7 Njara îrî nacio, îndî itigwata gîntû,
na magûrû îrî namo, na matiûmba gûtaambia,
na îtiûmba kwaria nwa ata na mîmero yayo.
8 Bara barûthaga mîbuanaano înu bakari t'yo,
kinya bonthe bara bamîîtîgagia.
9 Biû antû ba Isiraeri, îtîgiani Mwathani!
N'we ûbûteethagia na n'we rong'o yenu.
10 Biû ba rûrîîyo rwa Arûni, îtîgiani Mwathani!
N'we mûteethia wenu na n'we rong'o yenu.
11 Biû bara bûtîîyaga Mwathani, mwîtîgieni!
N'we mûteethia wenu, na rong'o yenu.
12 Mwathani n'atûririkanaga, agatûthaarima.
Akathaarima antû ba Isiraeri,
akathaarima mûciî wa Arûni, athînjîri ba Ngai.
13 Akathaarima bara batîîyaga Mwathani,
baanene na baniini.
14 Mwathani aroobwongeera ithaarimo,
biû na aana beenu.
15 Bûroothaarimwa i Mwathani,
ûra aûmbire îgûrû na nthî.
16 Îgûrû i rîa Mwathani,
îndî nthîgûrû amîeyana kîrî antû bonthe.
17 Ti bara bakuû bakumagia Mwathani,
bara bathiyaga bakeendama naara gûtaaragua.
18 Îndî tiû tûgaakumia Mwathani,
kuuma îmunthî mwanka tene na tene.
Kumiani Mwathani.