Nkaatho n'ûntû bwa kûriûkua kuuma gîkuûni
116
1 I mbendeete Mwathani n'ûntû bwa kwîguakayû gaakwa na maromba maakwa.
2 N'ûntû n'anthikagîîria bwega,
nkamûrombaga bunka ndî mwoyo.
3 Mîtego ya gîkuû n'îndigicîîte,
mathîîna ma nthiko i mangwete.
Ndanyamaara i mîthangîko na kîeba.
4 Rîru i rîo ndaakayîîre Mwathani,
“Itû Mwathani, ngûkwereka, onokia mwoyo wakwa.”
5 Mwathani n'ûmwega, na n'ûmwagîru,
î Ngai wetû arî kîao kiingî.
6 Mwathani n'akaragia bara batarî nkanja.
Rîra ndainyîrîîtue becû nkua, n'ambonokiirie.
7 Nkoro yakwa, cooka kînogokooni gîaku,
n'ûntû Mwathani n'akûrûthîrîîte bwega.
8 N'ûntû n'ûtunyûkîîtie nkoro yakwa yauma gîkuûni,
watûma meetho maakwa matiga gûtûûra meethori,
na magûrû maakwa maatiga gûtaratara.
9 Kwoogu ngakara nkîathîkagîra Mwathani
nthîgûrû îno îtûûraga antû.
10 Ntaatiga gwîtîgia kinya ûkeegua i ndaugire,
“Ndî ûmûnyamaarie mûno.”
11 Kiumbuthûkûûni gîakwa ndaugire,
“Antû bonthe n'arongo.”
12 I mbi ngûpa Mwathani
n'ûntû bwa wega bwake bunthe bûra aandûthîrîte?
13 Ngaûkîîria gîkombe gîkwonania wonokio bwake
na ngaakumia riîtwa rîa Mwathani n'ûntû bwa kûmbonokia.
14 Nkaingia wîrane bwakwa kîrî Mwathani
bara bamûgongaga bonthe bakîonaga.
15 Gîkuû gîa antû baake bara batheru
i gîntû kîrî gîtûmi mûno meethooni ma
Mwathani.
16 Itû Mwathani, na mma niû ndî mûruti ngûgî waku.
Mûruti ngûgî waku, mwana wa mûthûkûmi waku wa mwarî,
N'ûntharîîtie bira binthaîkîîte.
17 Ngakûrutîra kîgongwana gîa gûgûcookeria nkaatho
na ncooke ngûkayîre na maromba.
18 Nkaingia wîrane bwakwa kîrî Mwathani
bara bamûgongaga bonthe bakîonaga,
19 Ndeeni ya bantû aaku ara atheru Nyombani ya Ngai,
îra îrî Njerusaremu.
Kumiani Mwathani!