Ngai i mûnene wa anene bonthe
97
1 Mwathani i mûnene, nthîgûrû gwîrua!Icîgîîrio bia îria kenaani!
2 Athiûrûkîîrîîtwe i matu na mwindu ûmûrumanu,
arîathana na wagîru na ûmma.
3 Atongoragîîrua i mwanki,
na ûkarûngûria anthû baake nteere cionthe.
4 Rweni rwake rwenagia rûkamûrîka nthîgûrû,
n'yo îkainaina.
5 Irîma birarûkaga ta mûûra mbere ya Mwathani,
mbere ya Mwathani wa nthî yonthe.
6 Îgûrû rîtûmagîîria wagîru bwake,
nabo antû bonthe bakoona ûkumio bwake.
7 Bara bonthe bagongaga mîbuanaano, i bagîîyaga îgi,
bara bonthe beekumagia n'ûntû bwa mîbuanaano înu ya ûtheri
ngai cionthe n'ituragia maru mbere ya Mwathani.
8 Antû ba Sayuuni ibagwîrîîtue i kwîgua ûgu,
nacio taûni cia Njunda n'ikeneete,
n'ûntû bwa ûgiiti magamba bwaku, Mwathani.
9 N'ûntû woû, Mwathani i woû wathaga nthî yonthe,
woû, i Woû Ûrî Îgûrû Mûno nkûrûki ya ngai cionthe.
10 Mwathani n'eendeete bara bameneete ûthûûku,
n'amenyagîîra mîoyo ya antû baake bara eetîgua,
na akabatuunyûkia kuuma njaraani cia antû bara bathûûku.
11 Werû bûthararagîra bara baagîru,
na gîkeno gîgakinyîra bara beega nkoro.
12 Bwinthe bara baagîru kenaani ndeeni ya Mwathani, n'ûntû bwa bûra Mwathani arûthîîte,
na bûmûcookerie nkaatho.