Ngai n'we mûnene ûra mûnene
(1Karaaya 16:23-33)
96
1 Inîraani Mwathani rwîmbo rûûyerû!Inîraani Mwathani, biû antû ba nthîgûrû.
2 Inîraani Mwathani, na bûmûkumie!
Menyithanagiani mantû ma wonokio bwake wa ntugû kûrakîa.
3 Tûmîîriani ûkumio bwake kîrî mîgongo,
ngûgî ciake cia kûrigaria kîrî antû bonthe.
4 N'ûntû Mwathani n'ûmûnene, na nabatîîrue akumua mûno,
n'wa gîtîîyo nkûrûki ya ngai cionthe.
5 Ngai cia mîgongo îra îngî yonthe i cia mîbuanaano,
îndî Mwathani n'we waûmbire îgûrû.
6 Athiûrûûkîrîtwe n'ûkumio na ûnene,
inya na ûthongi biûyûri bantû aake ara atheru.
7 Kumiani Mwathani biû bwinthe antû ba nthîgûrû,
bûkumie inya yake na ûkumio bûra arî.
8 Kumiani Mwathani n'ûntû bwa ûkumio bwa riîtwa rîake,
ncûûni Nyomba yake bûrî na biewa.
9 Gongaani Mwathani n'ûntû bwa wega bwake na ûtheru bwake,
bwinaine bûrî mbere yake, biû bwinthe antû ba nthîgûrû.
10 Îraani mîgongo yonthe ûûgû, “Mwathani n'we mûnene!
Nthîgûrû n'îrûûngi îkarika na îtienyeenyeka,
na akaagiitîra antû îgamba bûra kûbatîîrue.”
11 Îgûrû ta irîgwîrue, na nthîgûrû n'yo îkene,
îria narîo i rîrurume na biûmbe bionthe bira birî ku.
12 Mînda n'îgwîrue na bionthe bira birî ku!
Rîru mîtî yonthe ya kîthaka yuuge nkemi,
13 mbere ya Mwathani n'ûntû n'ayîîte,
aayîîte kwatha nthîgûrû.
Akagiitîra nthîgûrû îgamba bûra kûbatîîrue,
na agiitîre antû nabo na ûmma bwake.