Rwîmbo rwa gûkumia Mwathani
95
1 Ncûûni twinîre Mwathani,ga twinîre Ngai ûra atûmenyagîîra tûkeneete!
2 Ga tûthi kîrî we tûrî na nkaatho,
na tûmwinîre nyîmbo cia kûmûkumia tûkeneete.
3 N'ûntû Mwathani i Ngai arî inya,
na i mûnene arî inya kîrî ngai ira ingî cionthe.
4 N'we aathanaga nthîgûrû yonthe,
kuuma makurunguuni mara moorokeru mûno mwanka irîmaani bira biraaya mûno.
5 N'we waathaga îria na n'we warîûmbire,
wana kinya nthîgûrû îîmbûno, îra we mwene aûmbire na njara ciake wengwa.
6 Ncûûni, tûmûturîrie maru tûmûgonge,
tûturieni maru mbere ya Mwathani Mûûmbi wetû!
7 N'ûntû n'we Ngai wetû,
tiû tûrî antû bara amenyagîîra,
ng'ondu cia ûrîîthi bwake.
Thikîîriani bûra akuuga îmunthî,
8 “Bûtikaûmie biongo ta bûra biûyûûyû bienu biarûthire Meriba,
kana bûra biarûthire ntugû îra biarî Masa naagu rwanda.
9 Naagu i noogo baanthimîîre na baangeria,
wana waya kwîgua i booneete mantû mara ndaabarûthîrîte.
10 Ndaakarire nthûûri n'antû babu bantû a mîanka mîrongo înna,
nkwîgua banthûûria ndauga, ‘Mathûgaania ma antû baba rîonthe meegagua marî kûraaya naani,
na batiathîkagîra maathana maakwa!’
11 Nkûthûûra ndathiîtia ndauga,
‘Batikooro bakinya nthîgûrû îra mbathuuranîrîte îrî kînogoko kîao.’ ”