Ngai n'we agiitagîra antû bonthe magamba
94
1 Mwathani, n'ûntû ûrî Ngai ûra arîîthagia,onania mûthûûro waku!
2 I woû ûgiitagîra antû bonthe magamba.
Ncû ûneenkere eekumia kîra kîbabateerie.
3 Mwathani, i mwanka rî antû bara bathûûku bagaatûûra bagwîrîîtue,
bagaakara ûgu mwanka rî?
4 Antû bara bathûûku î, bageekumia mwanka rî
na beekumagîria moothûûku mamu maao barûthaga?
5 Bathoontoragia antû baaku, Mwathani,
na bakainyîîria bara barî baaku bongwa.
6 Baûragaga aka ba ntigwa na twana tûkîa,
na bakaûraga ageni bara batwîre nthî yetû.
7 Baugaga, “Mwathani atigûtwona.
Ngai wa Isiraeri atithûgaanagia mantû ta mamu.”
8 Antû baakwa, i mbi îbûritîîtie ûûgû biaa bibi?
I bûkaûmea rî nguru ino?
9 Bûrîthûgaania Ngai ûra aatweere matû atiîgagua?
Kana bûrîthûgaania ûra aûmbire meetho ationaga?
10 I ka bûkûthûgaania Ngai ûra akaanûkagia antû rîra barî na mabîtia, atibakaanûkia?
Bûrîthûgaania Ngai wa ûyu arutanaga antû bonthe rî, atirî na ûmenyo?
11 Mwathani naiyî bûra antû bathûgaanagia,
naiyî mathûgaania maao i ma ûtheri.
12 Kîthaarimo i kîrî muntû ûra ûkaanûkagia, ûrî woû Mwathani,
muntû ûra ûrutanaga watho bwaku ûrî woû,
13 n'ûtûmaga eegua arî na kînogoko îgiita rîa thîîna,
mwanka rîra antû bara bathûûku bakeenjîrwa îrinya rîa kûbatega.
14 Mwathani atiitiganîria antû baake;
atiiteeyanîria antû bara barî baake bongwa.
15 Kûgiita magamba gûkaathingatîîra wagîru,
na bara baagîru nkoro nabo bakaagwata ûntû bûbu mbaru.
16 N'ûû waantheteere rîra bara bathûûku baareganaga naani?
N'ûû warî rûteere rwakwa nkîng'ang'ana na antû babu barûthaga ûthûûku?
17 Ta ûkeegua Mwathani atanteethia,
ndaayaga gûkua nthûti.a
18 Ndaugire, “I nkûgwa,”
îndî wendo bwaku bûra bûtathiraga, Mwathani, i bwantiirîîre.
19 Rîra nkoro yakwa îtangîkîîte na yanyamaara,
woû n'ûmbooragîîria na ûgatûma ngwîrua.
20 Woû ûtigwatanagîra na bara bagaambithanagia bûra gûtaagîrîte,
bara bakombagia watho.
21 Beethîranaga bakabaanga bûra bakûûraga antû bara baagîru,
bagatuîra antû batarî na mabîtia gûkua.
22 Îndî Mwathani n'atuîkîîte wîbitho bwakwa,
Ngai wakwa n'aamenyagîîra.
23 Akabakaanûkia n'ûntû bwa mabîtia maao,
na abathirie n'ûntû bwa meeyia maao.
Mwathani Ngai wetû akabathiria.