Îromba n'ûntû bwa gûcwa ûteethio
Îromba rîa Ndaundi.
86
1 Kiinda gûtû ûnthikîîrie, Mwathani, na ûncookerie,n'ûntû ndî na thîîna na ndî na ûbatu.
2 Ûtikaareke nkua,
n'ûntû i ngûtîîyaga,
mbonokia, n'ûntû ndî mûruti ngûgî waku na ingwîtîgîîtie.
3 Mbîgîîrua kîao, n'ûntû woû i woû Ngai wakwa,
nkûrombaga mûthenya unthe.
4 Kenia mûruti ngûgî waku woû Mwathani,
n'ûntû i woû ndombaga.
5 N'ûntû woû, Mwathani ûrî ûmwega na n'ûrekanagîra,
na ûûyûrîîtwe i wendo bûtakîthira kîrî bonthe bara bakûrombaga.
6 Thikîîria îromba rîakwa, Mwathani,
na wîgue kîrîro gîakwa ûnteethie.
7 Rîra ndî thîînaani i woû nkayagîra,
n'ûntû n'ûncookagîria maromba maakwa.
8 Gûtirî ngai ûngî ta woû, Mwathani,
na gûtirî nwa ûmwe arûthîîte bûra ûrûthîîte.
9 Mîgongo yonthe îra ûûmbîte
îkaaya îturie maru mbere yaku, Mwathani,
na îgonge riîtwa rîaku.
10 N'ûntû woû ûrî ûmûnene na ûrûthaga mantû ma kûrigaria,
woû wenka i woû Ngai.
11 Mwathani ndutana bûra ûkwenda ndûthaga,
na ngakwathîkagîra ndî na wîtîgio,
ndutana gûgûtûmîkîra ndîrutanîrîtie cwe.
12 Ingûgûcookeria nkaatho, Mwathani Ngai wakwa, na nkoro yakwa yonthe,
na ntûûre nkumithagia riîtwa rîaku tene na tene.
13 N'ûntû n'ûmboneetie wendo bwaku bûra bûtathiraga bûûnene mûno,
n'ûmbonokeetie kuuma nthikooni.
14 I mbithûkîrîîtwe n'antû eekumia, itû Ngai,
gîkundi gîa antû batarî kîao i gîkwenda kûûmbûraga,
antû batagûtîîyaga.
15 Îndî woû, Mwathani, ûrî Ngai wa kîao na wa wendo.
Ûtithûûrangaga na mpwî, ûrî wendo bûtakîthira na ûrî mwîtîgua.
16 Ngarûkîra na ûmbîgîîrue kîao,
mbîkîra inya niû mûruti ngûgî waku,
ûmbonokie niû mûruti ngûgî waku, mwana wa mwekûrû mûruti ngûgî waku.
17 Mbonia kîmenyithania kîa wega bwaku Mwathani,
kaingo bara baameneete boona ûgu bagîa îgi,
n'ûntû woû Mwathani n'ûntetheetie na wambooreria.