Kûrombera ûkiri
Kîrî mûtongoria wa wini. Sabuuri ya aana ba Kora.
85
1 Mwathani n'wegîîrue nthîgûrû yaku kîao,na wacookeria nciarwa cia Njakubu ûtonga bwake.
2 Warekera antû baaku meeyia maao
na wakunîkîra mabîtia maao.
3 Watiga kûbathûûrîra,
na wagarûka watigana na marûrû mara warî namo
maankanaga ta mwanki.
4 Tûcookanîîrie kaîrî, Ngai mwonokia wetû,
na ûthirie mûthûûro ûra ûrî nau kîrî tiû!
5 Mwathani, n'ûgaatûthûûrîra tene na tene?
I ka mûthûûro waku ûgatûûra ûtakûthira?
6 Tûriûkie kaîrî,
kaingo tiû, antû baaku, tûgaagûkumia.
7 Twonie wendo bwaku bûra bûtathiraga, Mwathani,
na ûtwonokie.
8 I nthikîîrîîtie bûra Mwathani Ngai akuuga;
n'ûntû akaaria mantû ma ûkiri kîrî antû baake,
wegua tûticookera mîtugo yetû ya waa.
9 Na mma n'eethuuranîrîte kwonokia bara bamûtîîyaga,
kaingo mwago wake ûtûûra nthîgûrû yetû.
10 Wendo na gwîtîgîka bigakomana,
wagîru na ûkiri bikaagwatana.
11 Gwîtîgîka gûkauma nthî ta mûkunû,
ûtheru bwa Ngai nabu bûkaraithagîîria nthî bûrî îgûrû.
12 Mwathani akeeyana kîra kîega,
na nthîgûrû yetû îkagîa maketha maingî.
13 Wagîru bûkaathiiyaga bûrî mbere ya Mwathani,
na bûmwengûragîre njîra.