Kwîrirîria Nyomba ya Ngai
Kîrî mûtongoria wa wini. Rwinwe na mwinîre wa rwîmbo rûra rwîtagwa “Ngitithi.” Sabuuri ya aana ba Kora.
84
1 N'ata mbendeete Nyomba yaku bûgana,Mwathani Mwene Inya!
2 Inkwenda mûno mbîgua ndî ku!
Inkwenda mbîgua ndî Nyomba ya Mwathani.
Ndiinîra Ngai ûra atûûraga mwoyo
na nkoro yakwa na inya yakwa yonthe nkeneete.
3 Kinya nyoni i cionaga bantû agûkara ku,
na nthûngûûrû nacio ikeebakîra ntara,
cia gûkarwa i tuunga twacio,
akubî na ithînjîro biaku,
Mwathani Mwene Inya, woû mûnene wakwa na Ngai wakwa.
4 Kîthaarimo i kîrî bara bakaraga Nyomba yaku,
rîonthe bainaga bagîgûkumagia.
5 Kîthaarimo i kîrî bara beeyagwa inya i woû,
bara beegagua barî na meerekeeria ma kûthi gûkûgoongera kîrîmaani gîa Sayuuni.
6 Rîra bakûrûkagîîra kiurooni kîra kîûmo kîa Baka,
batûmaga gîgatuîka bantû arî na inyaka,
na mbura ya mûratho nîtûmaga kwaraga rûûyî.
7 Bathiiyaga wa bakîongagîîra inya,
bakoona Ngai ûra mûnene kîrî ngai ira ingî cionthe gûku Sayuuni.
8 Îgua îromba rîakwa, Woû Mwathani Ngai Mwene Inya.
Tega matû wîgue, Woû Ngai wa Njakubu!
9 Thaarima mûnene wetû, woû Ngai rong'o yetû,
thaarima mwîtûûrîrua maguta waku ûra ûthuurîîte.
10 Gûtinda mûthenya ûmwe Nyombani yaku
i kwega nkûrûki ya gûkara bantû angî onthe ntugû ngiri.
Kaaba ndûngame mwîrîgaani wa Nyomba ya Ngai
nkûrûki ya gûtûûra mîciî ya bara bathûûku.
11 N'ûntû Mwathani Ngai n'we riûa na rong'o yetû,
n'ûntû bwa ûkumio na kîao gîake n'atûthaarimaga.
Atibaperia gîntû nwa kîmwe kîega,
kîrî bara bakaraga barî eetîgua.
12 Mwathani wa Njûûrî,
bara batûûraga bakwîgwetie, i bakenaga.