Kûrombera anthû ba Isiraeri bacindwa
Sabuuri ya Asabu.
83
1 Woû Ngai, tiga gûkira,tiga gûkara amwe, ûkiri kii!
2 Anthû baaku i bakuithûka,
na babu bakûmeneete nwaka bakûbûûmîria biongo.
3 I bakûbanga na witho bûra bakaarûthana na antû baaku.
Barîbîîndîra njûrî antû baaku bara ûmenyagîîra.
4 Barîîrana, “Ncûûni tûthirie mûgongo wao,
kaingo Isiraeri îtakîririkanwa kaîrî.”
5 I bakûgwatanîra mûbangooni ûyu wao
na bakûrîkanîîria bakaithûkîra antû baaku ba Isiraeri,
6 antû ba Endomu na ba Isumairi,
antû ba Moabu na Aagiri,
7 antû ba Ngebari, Amoni na Aamareki,
na Afirisiti na ba Turo.
8 Kinya Asîîria bakwîringanîra nabo,
kaingo bateethanîîria na ncamba cia rûrîîyo rwa Rooti ta cio Aamoni na Amoabu.
9 Barûthe ta bûra waarûthire Amindiani,
na Asisera na Njabini Muurooni wa Kisoni.
10 Wabathirîîrie Eni-Ndori,
na mîîrî yao yoorera nthî.
11 Rûtha atongoria baao bûra waarûthire Orebu na Seebu.
Tura aathani baao bonthe ta bûra warûthire Seba na Sarumuna,
12 bara baugire, “Tûthûkieni
nthîgûrû îno ya Ngai îtuîke yetû.”
13 Woû Ngai, banyagaarie ta tîîri,
kana ta maûngû magûrûkîîtue i kîbuubani.
14 Kana ta mwanki ûkîbîîthia mûthitû,
kana mwanki ûkîrîrîmbana kîrîmaani gîkîbîa,
15 beengatie na ûbatindîke na kîbuubani gîaku
na ûbamakie na kîbuubani gîaku kîînene.
16 Baûragithie nthoni, Mwathani,
kaingo beetîgia woû ûrî inya.
17 Baroogîa îgi na batûûre bamakîîte tene na tene,
baroogîa îgi tene na tene.
18 Baroomenya atî woû wenka akî, i woû Mwathani,
Ûra arî Îgûrû Mûno aathaga nthîgûrû yonthe.