Îromba n'ûntû bwa gûcwaa ûteethio
Kîrî mûtongoria wa wini. Rwinwe na mwinîre wa rwîmbo rûra rwîtagwa, “Maûa.” Sabuuri ya Ndaundi.
69
1 Mbonokia woû Ngai,n'ûntû rûûyî rûnkinyîîte nkingo.
2 Ndiamîîte mûtondooni,
kûra gûtarî gwa gûkinya.
Ndî ndiani îîndiku
na ndî akubî gûkondorua i mûguû
3 Inogeete kuumania na gûkaya nteethua,
na mîmero yakwa n'îgwankana.
Nwaka nkûûrîîte meetho,
ngîcwa ûûnteethia.
4 Bara baameneete woogu mana maatheri
i baingî mûno nkûrûki ya ntundu cia kîongo gîakwa.
Anthû baakwa baaragia ûrongo îgûrû rîakwa,
barî na inya na i bakwenda kûûmbûraga.
I baatûmire ncookia
into ntaiyîîte.
5 Woû Ngai, n'wiyî waa bwakwa,
meeyia maakwa matiithîka mbere yaku.
6 Ûtikaareke bara bagwîtîgîîtie bagîa îgi
n'ûntû bwakwa.
Îî, Mwathani, Mwathani wa Njûûrî,
Ûtikaareke bara bakûgongaga
baagîrwa gîtîîyo n'ûntû bwakwa,
Woû Ngai wa Isiraeri
7 N'ûntû irumi bira ndumîîtwe,
ndumîîtwe n'ûntû bwaku na ndaagîa îgi.
8 Nkari ta mûgeni kîrî antû beetû,
ta mbûyi kîrî aruayia na aarayia.
9 Ingûkua i wendo bwa Nyomba yaku.
Ûkîrumangwa wana niû ndumanagîrua naawe.
10 Ndenyiia na ndaatîîrîra kûrîa n'ûntû bwa maromba,
antû baanduma i kûrûtha ûgu.
11 Ndeekîîre mathango
baanthekeera.
12 Barî tûyîraani nwa ciakwa ciaragua,
na areebi nabo bakaambina na nyîmbo cia ntemi.
13 Îndî niû, Mwathani ndakûromba,
ûûncookerie maromba, woû Ngai, kagiitaani kara kaagîrîîte.
Ncookeria n'ûntû bwa wendo bwaku bûûnene,
n'ûntû nwaigaga wîrane bwa wonokio bwaku.
14 Mbonokia kuuma ntagaani,
ûtikaareke ndiama,
ntuunyûkia kuuma kîrî anthû baakwa,
nduta ndiani înu ndiku.
15 Ûtikaareke mûguû ûûnkondoria,
ûtikaareke mbûrîra ndiani,
kana nthûngîra nthikooni.
16 Ncookeria îromba rîakwa, Mwathani, wegaani bwaku bwa wendo bûtathiraga,
kûringana na kîao gîaku gîa kûrigaria, mbûndûkîra.
17 Ûtigeeciithe wambona niû mûruti ngûgî waku
ncookeria wendî, n'ûntû ndî thîînaani îmbîî.
18 Ncû ûûmbonokie,
ntuunyûkia kuuma kîrî anthû baakwa.
19 N'wiyî irumi bionthe bira ndumangîîtwe, bûra mbirîîtwe îgi na ndaagîrwa gîtîîyo,
anthû baakwa bonthe woû n'ûbaiyî.
20 Irumi bira ndumîîtwe i bimbûragîîte nkoro,
na ndaaga wîrîgîîro.
Indeerîgîîrîîte nkoona wa kûmbîgîîrua kîao, îndî gûtirî we ndoona.
Ndeerîgîîra nkoona wa gûnkirakiria, îndî gûtirî we wonara.
21 Rîra ndaarî na yûûra, bampeere irio biarî na cûmû,
na nkûgwatwa i bûûta, baankundiirie ndibei.
22 Biatho biao birootuîka mûtego bikabarîîkîria, bikabathiria.
Biatho biao bira bitheru birootûma bagwa meeyiani.
23 Barootuîkithua ntûngi bagatiga kwona,
mîgongo yao îrootûûraga îgunkuîte i kwaga inya.
24 Boonorerie mûthûûro waku,
barookinyîrwa i mûthûûro waku ûra ûgwakana ta mwanki.
25 Mîciî yao irootuîka maganjo,
gûtikaagîte muntû nwa ûmwe athaamîra maremaani maao.
26 Banyamaaragia bara ûrikîîtie na gûkaanûkia,
na bakaaria mantû ma mathîîna ma bara wagurariirie.
27 Ongeera îkaanûkia rîao na îkaanûkia rîngî,
ûtikaareke boona nwambi wonokioni bwaku.
28 Mariîtwa maao imabuutwe îbukuuni rîa mwoyo,
batigaataranîrue amwe na bara baagîru.
29 Ndî na kîeba na ûrûrû,
wonokio bwaku, woû Ngai, bûroomenyeera.
30 Ngaakumia riîtwa rîa Ngai na rwîmbo.
Nkamûneneagia nkîmûcookagîria nkaatho.
31 Ûntû bûbû bûgaakenia Mwathani nkûrûki ya kûmûrutîra ng'ombe,
na nkûrûki ya kûmûrutîra ncamba amwe na ngoci na ncûûga ciayo.
32 Bara bainyîîrîîtue boona ûûgû, bakagwîrua,
bara bagongaga Ngai bakaûmîîrua nkoro.
33 Mwathani n'athikagîîria bara barî na ûbatu,
na atiriganagîrua n'antû baake bara bathaîkîîtwe nceera.
34 Kumiani Ngai biû îgûrû na nthî,
amwe na maria na biûmbe bionthe bira birî ku,
35 Ngai akoonokia Njerusaremu
na acooke aake taûni cia Njunda kaîrî.
Rîru antû baake batûûre ku na beegwatîre nthîgûrû înu îtuîke yao.
36 Aana ba aruti ngûgî baake bakeewa yoo îtuîke yao,
na bara beendeete riîtwa rîake bagaatûûra ku.