Rwîmbo rwa gûkûngwîra ûûmbani
Kîrî mûtongoria wa wini. Sabuuri ya Ndaundi.
68
1 Ngai n'aaye, anthû baake banyagaarue,bara bamûmeneete bakuthûke baûre!
2 Wa ta bûra ntoogo îkamatagwa i ruuo,
babue, baûre kîûngo ta ntoogo ya mûraangi,
wa ta bûra mayeco makanjûkaga i mwanki,
bara bathûûku baroothira woogu mbere ya Ngai.
3 Îndî bara baagîru baroogwîrua
na bagakena barî mbere ya Ngai,
barooringa nkemi n'ûntû bwa gûkena.
4 Inîrani Ngai, mwinîreeni bûkîgongaga riîtwa rîake.
Mûrûthîreeni njîra we ûyu ayîîte arî matuuni,a
riîtwa rîake i Mwathani,
wîruani bûrî mbere yake.
5 Ngai ûra akaraga Nyomba yake îra ntheru,
n'we amenyagîîra twana tûkea na eekûrû ntigwa.
6 Mwathani n'we eyaga bara batarî ûtûûro bantû a gûtûûra.
Akatharia bara bathaîke nceera akabaa wîyathi na gîkeno,
îndî bara bareganaga na watho bagaatûûra nthîgûrû îîmbûmo.
7 Woû Ngai, rîra wathiire ûtongorereetie antû baaku,
rîra wakûrûkîîre rwanda,
8 nthîgûrû n'yainainire,
na îgûrû rîaurithia mbura,
mbere ya Ngai wa Sinai,b
mbere ya Ngai wa Isiraeri.
9 N'waurithiirie mbura îmbiingî, woû Ngai,
yaura yaakoria nthîgûrû yaku îra yarî îîmbûmo.
10 Antû baaku beebonera ûtûûro,
na n'ûntû bwa wega bwaku Ngai, waingia moobatu ma antû baaku.
11 Mwathani aarutire watho,
nabo eekûrû baingî baathi na ntûmwa inu bagîtûmagîîria.
12 “Kinya anene na njûûrî ciao cia ndûa baakuthûka na rwîro!”
Nabo eekûrû ba Isiraeri baagaana into bira biataîîtwe.
13 Kinya bara baatûûraga biugûûni bia ng'ondu baatonga,
Beeguîkîrîte na thaabu na fetha
ta bûra maceac meeguîkagîra na mathabu maamo,
na mbwî ciayo ciakandîîtwe na thaabu îtarî mbunganie.
I kî n'ûntû bamwe beenu beebithire biugûûni bia ng'ondu gûkûgîa na ndûa?
14 Rîra Ngai Mwene Inya Yonthe aanyagaariirie anene Kîrîmaani kîa Sarumoni,
n'aatûmire mbura ya mbaraabu yuura kîrîmaani gîku.
15 I ka kîrîma kîa Mbasani kîneneete ata,
i ka kîrî na tûthûmbîri tuingîîte ata!
16 Biû irîma biiraaya, i mbi n'ûntû bûgûcûûba na rûriitho
kîrîma kîra Ngai athuurîîte gîtuîka gîkaro gîake?
Mwathani agaatûûraga ku tene na tene.
17 Mwathani arooya bantû ara atheru
aumîîte kîrîmaani gîa Sinai,
arî na nkaarî cia mbaraathi itatarîka.
18 Rîra eetiirie îgûrû kîrîmaani,
arî na agwate baingî,
n'aathûkiirie biewa kuuma kîrî antû,
na kinya kuuma kîrî antû bara ndemi.
Kaingo Mwathani Ngai agaatûûra kîrî bo.
19 Mwathani arookumua,
we ûra atûkamatagîra mîrigo yetû wa ntugû wa ntugû. N'we Ngai ûra atwonokagia.
20 Ngai wetû i Ngai ûra wonokanagia,
n'we Mwathani Ngai wetû, ûra atûtuunyûkagia kuuma gîkuûni.
21 N'ûmma Ngai akaathithira biongo bia anthû baake,
bara batatiganaga na mîtugo yao ya wîyia.
22 Mwathani augîîte, “Ngaacookia anthû beenu kuuma Mbasani.
Nkaabaruta îriani kûra kworokeru mbacookie,
23 kaingo bûkaathamba magûrû nthakameeni yao.
Na kurû cienu ibacûnacûne wa bûra i kwenda.”
24 Mûkinyîre waku wa ûûmbani n'ûkwoneka n'antû bonthe,
i booneete mûkarîre wa Ngai, mûnene wakwa, ûkîthûngîra bantû aake ara atheru.
25 Aini i bo batongoreetie, bakathiingatwa n'aringi ba inanda,
nabo aarî bara bakûriinga tamburini barî gatîgatî.
26 Bariina bakiugaga, “Kumiani Ngai kîûthûranooni gîa antû baake.
Kumiani Mwathani biû ba rûrîîyo rwa Njakubu!”
27 Batongorereetue i mwîrîga ûra mûniini mûno wa Benjameni,
ûkathingatwa n'atongoria ba Njunda na gîkundi kîao,
bara nabo baathingatîîtwe n'atongoria ba Seburuni na ba Nabutarî.
28 Ngai onania inya yaku,
îra watûmîîre n'ûntû bwetû,
29 uumîîte Nyomba yaku îra îrî Njerusaremu,
naara anene bakûreetagîra biewa.
30 Gondokera Miisiri, nyamû înu îkaraga nthanjeeni.
Gondokera mîgongo îra îkari ta ndîîthia ya ng'ombe na tûyaû twacio,
mwanka rîra bagakwînyiîria na bakûrutîre fetha.
Nyagaaria antû bara beendeete kûrûa.d
31 Antû ba gîtûmi bakaaya bakuîte biewa baumîîte Miisiri.
Antû ba Ethiopia nabo bakaatharîra gûûkîîria njarae ciao bakîromba Ngai.
32 Inîraani Ngai, biû moonene ma nthîgûrû,
inaani bûgîkumagia Ngai,
33 ûra athiyagîra îgûrû rîra rîtûûraga oogo kuuma wo tene.
Tamûthikîîrieni bûra agondokaga nainya îgana.
34 Tûmîîriani inya ya Ngai,
ûnene bwake i bu bûkaragia Isiraeri bûrî îgûrû rîao,
inya yake n'yo îrî matuuni.
35 Woû Ngai, n'ata ûrî wa kûmakania rîra ûûyaga uumîîte bantû aaku ara atheru!
Ngai wa Isiraeri n'we weyaga antû baake inya na kûûmbana.
Ngai arookumua!