Rwîmbo rwa gûcookia nkaatho
Kîrî mûtongoria wa wini. Sabuuri. Yiinwe na into bia kwina bia ndigi.
67
1 Ngai twîgîîrue kîao na ûtûthaarime,na ûtûraithîîrie na wega bwaku,
2 kaingo nthîgûrû yonthe îmenya wendi bwaku,
na kaingo inya yaku ya kwonokania îmenyekana i mîgongo yonthe.
3 Ûrookumagua n'antû, Woû Ngai,
antû bonthe baroogûkumia.
4 Mîgongo îroogwîrua na iine na gîkeno,
n'ûntû woû ûgiitagîra antû magamba bûra kûbatîîrue,
na ûgatongoria mîgongo yonthe ya nthîgûrû.
5 Antû baroogûkumia, Woû Ngai,
antû bonthe baroogûkumia!
6 Nthîgûrû n'îrutîîte maciaro maayo.
Ngai, Ngai wetû n'atûthaarimîîte.
7 Ngai aroothi na mbere gûtûthaarima,
arootîîyawa n'antû mwanka mîthia ya nthîgûrû yonthe.