Rwîmbo rwa gûkumia na gûcookia nkaatho
Kîrî mûtongoria wa wini. Sabuuri ya Ndaundi.
66
1 Kumiani Ngai na tûyû twa nkena,antû bonthe ba nthîgûrû!
2 Inîraani ûkumio bwa riîtwa rîake,
inaani nyîmbo na buuge, “Ngai n'ûmûnene!”
3 Îraani Ngai, “Mantû mara ûrûthaga i ma kûrigaria!
N'ûntû bwa inya yaku îînene,
anthû baaku baturagia maru mbere yaku beenyiîtie n'ûguaya.
4 Muntû wonthe arî nthîgûrû n'akûgongaga,
bakwinagîra nyîmbo cia gûkûgonga,
bainaga bagîkumia riîtwa rîaku.”
5 Ncûûni bwone mantû mara Ngai arûthîîte,
mantû ma kûrigaria mara arûthîîte n'ûntû bwa antû.
6 Aagarûrire îria rîatuîka nthî îmbûmo,
biûyûûyû bietû biaringire rûûyî bithiîte na magûrû.
Agu twakeneera n'ûntû bwa mantû mara aarûthire.
7 Aathanaga na inya yake tene na tene,
meetho maake makaraga maraithîîrîîtie mîgongo.
Antû bara bareganaga n'we bamenyeere batikeebûkîîrie.
8 Kumiani Ngai wetû, biû antû ba mîgongo yonthe,
Rekaani kûmûkumia kwenu kwîguîke.
9 N'atwaigîîte mwoyo,
na atirareka magûrû meetû mabaratia.
10 Woû Ngai, n'watûgeriirie twathûngîra magerioni,
watûkemba ta bûra fetha îkeembagwa na mwanki.
11 Watûrekeeria twagwa mûtegooni
na watwaîkia mîrigo îmîrito.
12 Watûrekeeria anthû batûkinyanga,
twagiitîîra rûûyîîni na mwankiini,
îndî îîndî n'ûtûthaarimîîte na mantû meega.
13 Nkaareeta igongwana bia kûbîîthua nyomba yaku.
Nkaaruta kîra ndaugire mbingie wîrane bwakwa kîrî woû.
14 Nkeeyana kîra ndaugîîte nkeeyana
rîra ndaarî na thîîna.
15 Ngakûrutîra ntûrûme ira noru mûno cia kûbîîthîrua kîthînjîrooni,
na nkûrutîre igongwana bia ng'ombe na mbûri,
na ntoogo yabio îgeetia îgûrû.
16 Ncûûni bwîgue, biû bwinthe bara bûtîîyaga Ngai,
na nkabwîra bûra aandûthîrîte.
17 Ndaamûrîrîîre nainya aanteethia,
na ndamwinîra nyîmbo cia kûmûkumia.
18 Ûkaaya kwîgua kûrî wîyia ndaithîîte nkorooni yakwa,
Mwathani atikînthikîîria.
19 Îndî na mma Ngai n'anthikîîrie,
na eegua kayû gaakwa nkîromba.
20 I ngûkumia Ngai,
n'ûntû bwa kwîgua maromba maakwa
na kûmbeenda rîonthe na njîra ya gwîtîgîka.