Rwîmbo rwa gûkumia na gûcookia nkaatho
Kîrî mûtongoria wa wini. Sabuuri ya Ndaundi.
65
1 Woû Ngai, itûbatîîrue tûgûkumagia tûrî Sayuunina tûûyûragie wîrane bwetû bûra twaigire naawe,
2 n'ûntû n'ûcookagia maromba meetû,
antû bonthe bakaaya kîrî woû n'ûntû bwa meeyia maao.
3 Mabîtia meetû matûcinda,
n'ûtûrekagîra mo.
4 Kîthaarimo i kîrî bara ûthuurîîte,
bara ûreetaga batûûra Nyomba yaku.
Tûkaaganîrwa i mantû maaku meega ma nyomba yaku,
ithaarimo bia Nyomba yaku întheru.
5 Ûtûcookagîria maromba meetû na njîra ya gûtwaa ûûmbani
na ûkarûtha mantû ma kûrigaria ma gûtwonokia.
Antû nthîgûrû yonthe,
na bara barî kûraaya ngongo cia maria i bagwîtîgîîtie.
6 Waûmba irîma na inya yaku,
wonania inya yaku îînene îra ûrî.
7 Ûkiragia mûrurumo wa maria,
gîtuma kîa mîkumbîîrî ya mo,
na ûgaakiria gîtuma kîa mîgongo.
8 Antû ba nthîgûrû yonthe i barigarîîtue i mantû maanene mara ûrûthîîte.
Ngûgî ciaku nitûmîîte antû baugîîria nainya bakeneete
kuuma mûthia ûmwe wa nthîgûrû mwanka ûra ûngî.
9 Ngai i woû ûmenyagîîra nthîgûrû na ûkamiurithîria mbura,
n'ûmîtongetie na ûgatûma înora mûno.
I woû ûûyûragia tuuro na rûûyî,
na nwa woû weyaga antû irio.
Ûûgû i bu ûmîthuuranagîra,
10 Uurithagîria mînda îra mîrîme mbura ya kûgana,
na ûkamîrinda na rûûyî.
Ûkainyia mûthetu na manyunyuû
na ûgatûma imera bikûra.
11 Wa mwanka n'weyanaga maketha maingî n'ûntû bwa wega bwaku,
Wa ara onthe ûthiiyaga kûûyûraga ûtonga.
12 Rûriî rûûyûri ng'ondu,
na tûrîma twaûyûrwa i gîkeno.
13 Ithaka biruuyîîtwe i ng'ondu,
na biuro biakunîkwa n'irio.
Into bionthe nwaka bikuugîîria bikiinaga i gûkena.